बाँके फागुन १२ गते ।
आगामी फागुन २१ गते हुने प्रतिनिधिसभा सदस्य निर्वाचनलाई लक्षित गर्दै बाँके जिल्लामा पाँच हजारभन्दा बढी सुरक्षाकर्मी परिचालन गरिएको छ। भारतसँग खुला सीमाना जोडिएको जिल्ला भएकाले बाँकेलाई अति संवेदनशील मानिएको र त्यसअनुसार उच्च सतर्कतासहित सुरक्षा व्यवस्था मिलाइएको जिल्ला सुरक्षा समितिले जनाएको छ।
जिल्ला सुरक्षा समितिका संयोजक तथा बाँकेका प्रमुख जिल्ला अधिकारी दिलकुमार तामाङका अनुसार जिल्लाका १३९ मतदान स्थलको सुरक्षाका लागि नेपाली सेनासहित पाँच हजार ५५३ सुरक्षाकर्मी खटाइएको छ। उनका अनुसार नेपाल प्रहरीका एक हजार ५००, सशस्त्र प्रहरी बलका एक हजार, नेपाली सेनाका ५५३ तथा दुई हजार ५०० जना निर्वाचन प्रहरी परिचालन गरिएको छ।
प्रमुख जिल्ला अधिकारी तामाङले परिचालित सुरक्षाकर्मीहरूले संयुक्त तथा छुट्टाछुट्टै टोलीमार्फत विभिन्न स्थानमा गस्ती, सूचना सङ्कलन तथा स्थानीय बासिन्दासँग समन्वय गर्ने कार्य सुरु गरिसकेको जानकारी दिए।
यसैगरी, जिल्ला प्रहरी कार्यालय बाँकेका प्रहरी प्रमुख प्रहरी उपरीक्षक अङ्गुर जिसीले निर्वाचन सुरक्षाका लागि आवश्यक सम्पूर्ण तयारी पूरा भइसकेको बताए। उनले खुला सीमासँग जोडिएको जिल्ला भएकाले सुरक्षा संवेदनशीलतालाई ध्यानमा राख्दै भारतीय सुरक्षा अधिकारीहरूसँग बैठक गरी आवश्यक समन्वय र सहकार्य गर्ने निर्णय गरिएको स्पष्ट पारे।
उता, जिल्ला निर्वाचन कार्यालय बाँकेले निर्वाचनका तयारीहरू अन्तिम चरणमा पुगेको जनाएको छ। कार्यालय प्रमुख टेकबहादुर शाहीका अनुसार निर्वाचनमा खटिने ८०६ जना मतदान अधिकृत तथा सहायक मतदान अधिकृतहरूलाई तालिम दिने कार्य तीव्र गतिमा सञ्चालन भइरहेको छ।
समग्रमा, निर्वाचनलाई शान्तिपूर्ण, निष्पक्ष र व्यवस्थित बनाउन सुरक्षा तथा व्यवस्थापकीय तयारी तीव्र पारिएको सम्बन्धित निकायहरूले जनाएका छन्।
Discussion about this post