बाँके फागुन २० गते ।
मौन अवधिको उल्लंघन गर्दै नेकपा एमाले बाँकेका नेता तथा पूर्व उप–सचिव प्रमोद धितालले बाँकेका प्रमुख जिल्ला अधिकारी (सिडिओ) दिलकुमार तामाङविरुद्ध सामाजिक सञ्जालमा आक्रोशपूर्ण अभिव्यक्ति दिएका छन्।
निर्वाचन आचारसंहिता लागू भइसकेको अवस्थामा धितालले फेसबुकमार्फत सिडिओ तामाङलाई लक्षित गर्दै अपमानजनक टिप्पणी सार्वजनिक गरेका थिए। सामाजिक सञ्जालमा उनले लेखेका थिए, “तैले कांग्रेसको पोस्ट हेर न सिडिओ ? चुनावपछि हेर तेरो औकात।”
उक्त अभिव्यक्ति सार्वजनिक भएपछि विवाद बढेपछि धितालले आफ्नो फेसबुक स्टाटस हटाएका छन्। बाँके प्रशासनले आचारसंहिता उल्लंघनबारे आवश्यक प्रक्रिया अघि बढाउने तयारी गरिरहेको स्रोतले जनाएको छ।
धितालले सामाजिक सञ्जालमा विभिन्न व्यक्तिलाई लक्षित गर्दै यसअघि पनि विवादास्पद अभिव्यक्ति दिने गरेको बताइन्छ। हाल जिल्ला प्रशासन कार्यालय बाँकेले निर्वाचन आचारसंहिता कडाइका साथ लागू गर्दै राजनीतिक दल, उम्मेदवार तथा सञ्चारमाध्यमलाई समेत सचेत गराइरहेको छ।
एमाले नेता धिताल समानुपातिक उम्मेदवार विजया धितालका पति हुन्।
यस विषयमा बाँकेका प्रमुख जिल्ला अधिकारी तामाङले राष्ट्रसेवक कर्मचारीमाथि निर्वाचनका सन्दर्भमा सार्वजनिक टिप्पणी हुनु दुःखद भएको बताएका छन्।
“उहाँले आफ्नो स्टाटस हटाइसक्नु भएको छ। उहाँमा केही स्वास्थ्यसम्बन्धी समस्या रहेको जानकारी आएको छ। हामी निर्वाचनलाई निष्पक्ष र शान्तिपूर्ण रूपमा सम्पन्न गर्ने तयारीमा छौं,” प्रजिअ तामाङले बताए।
Discussion about this post