बाँके फागुन २० गते।
बिहीबार हुने प्रतिनिधिसभा सदस्य निर्वाचनलाई सुरक्षित, शान्तिपूर्ण र व्यवस्थित रूपमा सम्पन्न गराउने उद्देश्यले बाँके जिल्लामा सुरक्षा व्यवस्था थप कडा पारिएको छ।
निर्वाचनको मौन अवधि सुरु भएसँगै जिल्ला सुरक्षा समितिले जिल्लाको समग्र सुरक्षा अवस्थाको समीक्षा गर्दै मतदान स्थलहरूको स्थलगत निरीक्षण तथा अनुगमनलाई तीव्र बनाएको छ।
जिल्ला सुरक्षा समिति बाँकेका संयोजक तथा प्रमुख जिल्ला अधिकारी दिलकुमार तामाङले सुरक्षा व्यवस्थालाई प्रभावकारी बनाउन मतदान स्थलहरूको अनुगमन गरिँदै आएको बताए। उनका अनुसार अनुगमनका क्रममा देखिएका कमीकमजोरीलाई तत्काल सुधार गर्दै निर्वाचनलाई शान्तिपूर्ण रूपमा सम्पन्न गराउने तयारी भइरहेको छ।
उनले अति संवेदनशील रूपमा वर्गीकृत गरिएका ६१ वटा मतदान स्थललाई विशेष प्राथमिकतामा राखेर अन्तिम चरणको अनुगमन र निरीक्षण भइरहेको जानकारी दिए।
प्रमुख जिल्ला अधिकारी तामाङको नेतृत्वमा रहेको अनुगमन टोलीमा जिल्ला प्रहरी कार्यालय बाँकेका प्रहरी प्रमुख प्रहरी उपरीक्षक अङ्गुर जिसी, सशस्त्र प्रहरी उपरीक्षक भीम चन्द, नेपाली सेनाको बज्रदल गणका प्रमुख सेनानी रामचन्द्र श्रेष्ठ तथा राष्ट्रिय अनुसन्धान विभाग बाँकेका प्रमुख हरिषबहादुर विष्टलगायत सुरक्षा निकायका प्रतिनिधिहरू सहभागी रहेका थिए।
अनुगमन टोलीले सीमा क्षेत्रका साथै संवेदनशील मतदान स्थलहरूको सुरक्षा अवस्था, कर्मचारी परिचालन, आवश्यक समन्वय तथा मतदान केन्द्र निर्माणको अवस्थाबारे स्थलगत जानकारी लिएको जिल्ला प्रहरी कार्यालय बाँकेका प्रहरी प्रमुख प्रहरी उपरीक्षक जिसीले जानकारी दिए।
उनका अनुसार अनुगमनका क्रममा सुरक्षा व्यवस्था तथा मतदान स्थल निर्माणको कार्य सन्तोषजनक रूपमा अघि बढिरहेको पाइएको छ। निर्वाचनलाई लक्षित गर्दै सोमबार मध्यरातदेखि नेपाल–भारत सीमा नाका सिल गरिएको छ।
यसैबीच, जिल्लाका सबै मतदान केन्द्रमा कर्मचारी तथा सुरक्षा निकाय परिचालन भइसकेको र आवश्यक प्रक्रिया पूरा गर्दै मतदान केन्द्र निर्माणको काम तीव्र गतिमा भइरहेको मुख्य निर्वाचन अधिकृतको कार्यालय नेपालगञ्जले जनाएको छ।
जिल्ला प्रशासन कार्यालयले शान्तिपूर्ण र निष्पक्ष निर्वाचन सम्पन्न गराउन सबै पक्षलाई सहयोग र सहकार्य गर्न आग्रह गरेको छ।
Discussion about this post