कञ्चनपुर फागुन २८ गते ।
कञ्चनपुरमा जिप र मोटरसाइकल एकआपसमा ठोक्किँदा दुई जनाको मृत्यु भएको छ ।
बिहीबार दिउँसो पूर्व–पश्चिम राजमार्गअन्तर्गत लालपुरमा विपरीत दिशाबाट आइरहेका जिप र मोटरसाइकल ठोक्किँदा मोटरसाइकल चालक र पछाडि सवार व्यक्तिको मृत्यु भएको हो ।
जिल्ला प्रहरी कार्यालय कञ्चनपुरका प्रहरी निरीक्षक वीरेन्द्रसिंह थापाका अनुसार पश्चिमबाट पूर्वतर्फ जाँदै गरेको से १ च १४०५ नम्बरको जिप र पूर्वबाट पश्चिमतर्फ आउँदै गरेको म २ प ३५०६ नम्बरको मोटरसाइकल बेदकोट नगरपालिका अन्तर्गत लालपुर चौराहामा एकआपसमा ठोक्किँदा दुर्घटना भएको थियो ।
दुर्घटनामा गम्भीर घाइते भएका मोटरसाइकल चालक र पछाडि सवार व्यक्तिलाई उपचारका लागि महाकाली प्रादेशिक अस्पताल पु¥याइएको थियो । तर उपचारकै क्रममा चिकित्सकले दुवै जनालाई मृत घोषणा गरेका प्रहरी निरीक्षक थापाले जानकारी दिए ।
प्रहरीले जिप चालक पुनर्वास नगरपालिका–११ का २२ वर्षीय सुनील चौधरीलाई नियन्त्रणमा लिएर घटनाबारे थप अनुसन्धान गरिरहेको जनाएको छ । मृतक दुवै जनाको परिचय भने हालसम्म खुल्न नसकेको प्रहरीले जनाएको छ ।
Discussion about this post