बाँके, भदौ २८ गते ।
बाँकेमा सवारी दुर्घटनाको सङ्ख्या बढ्दै गएको छ । दुर्घटनाको प्रमुख कारण तीव्र गति देखिएको छ । चालकको लापरवाही, जथाभावी ओभरटेक र ट्राफिक नियमको बेवास्ताले पनि जोखिम बढाएको प्रहरीले जनाएको छ ।
जिल्ला ट्राफिक प्रहरी कार्यालय बाँकेका अनुसार आर्थिक वर्ष २०८२/८३ मा जिल्लामा ८१० वटा सवारी दुर्घटना भएका थिए । ती दुर्घटनामा ६० जनाको मृत्यु भएको थियो भने करिब एक हजार ३०० जना घाइते भएका थिए ।
जिल्ला ट्राफिक प्रहरी कार्यालय बाँकेका प्रमुख प्रहरी निरीक्षक कनकबहादुर शाहीले दुर्घटनाको विश्लेषण गर्दा अधिकांश घटनामा तीव्र गति मुख्य कारण देखिएको बताए । गत आर्थिक वर्षमा तीव्र गतिमा सवारी चलाउने ५८० जना चालकलाई कारबाही गरिएको थियो । उनीहरूबाट तीन लाख तीन हजार पाँच सय रुपैयाँ जरिवाना असुल गरिएको थियो ।
“दुर्घटनाको सङ्ख्या र कारबाहीमा पर्ने चालकको अवस्था हेर्दा तीव्र गति नियन्त्रणलाई प्राथमिकतामा राख्नुपर्ने देखिएको छ,” उनले भने, “गति नियन्त्रणसँगै ट्राफिक नियमको प्रभावकारी कार्यान्वयनमा पनि जोड दिएका छौँ ।”
चालु आर्थिक वर्षको पहिलो महिनामै बाँकेमा ८४ वटा सवारी दुर्घटना भएका छन् । साउनमा भएका दुर्घटनामा तीन जनाको मृत्यु भएको छ भने १४२ जना घाइते भएका छन् । घाइतेमध्ये २३ जनाको अवस्था गम्भीर र ११९ जनाको अवस्था सामान्य रहेको प्रहरीले जनाएको छ ।
दुर्घटना न्यूनीकरणका लागि ट्राफिक प्रहरीले नियमित चेकजाँच र निगरानी बढाएको छ । मादक पदार्थ सेवन गरी सवारी चलाउने चालकको मापसे परीक्षणसँगै लागुऔषध सेवनको आशङ्कामा लापसे परीक्षणसमेत गर्ने गरिएको प्रहरीले जनाएको छ ।
गत आर्थिक वर्षमा मापसे गरी सवारी चलाउने ८६५ जनालाई कारबाही गरिएको थियो । उनीहरूबाट चार लाख ६४ हजार रुपैयाँ राजस्व सङ्कलन भएको जिल्ला ट्राफिक प्रहरी कार्यालयले जनाएको छ ।
ट्राफिक प्रहरीले कारबाहीसँगै सचेतनामूलक कार्यक्रमलाई पनि निरन्तरता दिएको छ । गत आर्थिक वर्षमा जिल्लाका विभिन्न स्थानमा करिब एक हजार १०० पटक ट्राफिक सचेतना कार्यक्रम सञ्चालन गरिएको थियो । त्यसबाट करिब ९० हजार चालक तथा विद्यार्थी लाभान्वित भएको शाहीले बताए ।
नागरिक सरोकार मञ्च बाँकेका संयोजक कृष्णप्रसाद श्रेष्ठले नेपालगन्ज र आसपासका क्षेत्रमा तीव्र गतिमा सवारी चलाउने तथा जथाभावी ओभरटेक गर्ने प्रवृत्ति बढेको बताए । उनका अनुसार चालकलाई तोकिएको गति सीमाभित्र सवारी चलाउन बाध्य पार्ने गरी नियमित अनुगमन र चेकजाँच बढाउन आवश्यक छ । “सडक सुरक्षासम्बन्धी जनचेतना अभियानलाई पनि निरन्तरता दिनुपर्छ,” उनले भने ।
बाँकेमा सवारी चाप बढ्दै जाँदा दुर्घटनाको जोखिम पनि बढेको छ । ट्राफिक प्रहरीको नियमित निगरानी, चेकजाँच र सचेतनामूलक कार्यक्रमसँगै चालकले जिम्मेवार व्यवहार र ट्राफिक नियमको पालना गरे दुर्घटनाबाट हुने मानवीय क्षति घटाउन सकिने सरोकारवालाको भनाइ छ ।
Discussion about this post