धनकुटो, असोज ४ गते ।
धनकुटाको छथर जोरपाटी गाउँपालिका–३, बन्चरेस्थित कामिटारमा सुमो दुर्घटना हुँदा एक वृद्धाको मृत्यु भएको छ । दुर्घटनामा १० जना घाइते भएका छन् ।
प्रहरीका अनुसार आइतबार बिहान करिब ९ बजे छथर जोरपाटी–३ स्थित पिङडाँडा ताङ्खुवाबाट धरानतर्फ जाँदै गरेको को १ ज २४९४ नम्बरको सुमो ब्रेक फेल भएर अनियन्त्रित भई सडकबाट करिब १० मिटर तल खसेको हो ।
दुर्घटनामा छथर जोरपाटी गाउँपालिका–३ की करिब ६० वर्षीया शोकमाया लिम्बूको घटनास्थलमै मृत्यु भएको जिल्ला प्रहरी कार्यालय धनकुटाका प्रहरी प्रवक्ता डीएसपी हेमन्त भण्डारी क्षेत्रीले बताए । उनका अनुसार दुर्घटनामा सुमो चालक धनकुटा नगरपालिका–९, गुठीटारका ३१ वर्षीय खगेन्द्र खत्रीसहित १० जना घाइते भएका छन् ।
घाइते हुनेमा छथर जोरपाटी गाउँपालिका–३ का ४० वर्षीया धनमाया राई, ७ वर्षीय न्युहाङ सुब्बा, ३३ वर्षीय पुनम लिम्बू, २ वर्षीया आरध्या लिम्बू, २६ वर्षीय आईन्द्र लिम्बू, २७ वर्षीया भवानी लिम्बू, ४७ वर्षीय हेमबहादुर लिम्बू, ३० वर्षीय अबिन लिम्बू र २१ वर्षीय आषिश लिम्बू रहेका छन् ।
घाइते सबैलाई उपचारका लागि धरानस्थित बीपी कोइराला स्वास्थ्य विज्ञान प्रतिष्ठानको घोपा पठाइएको प्रहरीले जनाएको छ ।
मृतक शोकमाया लिम्बूको शव जिल्ला अस्पताल धनकुटामा राखिएको छ । आवश्यक कानुनी प्रक्रिया पूरा गरी शव परीक्षण गर्ने तयारी भइरहेको डीएसपी भण्डारीले बताए । प्रहरीले दुर्घटनाको थप अनुसन्धान भइरहेको जनाएको छ ।
Discussion about this post