बाँके चैत ४ गते।
खाद्य व्यवस्था तथा व्यापार कम्पनी लिमिटेडको नेपालगञ्जस्थित कार्यालयमा हाल १९ हजार क्विन्टल चामल र १० हजार क्विन्टल धान मौज्दात रहेको छ।
कार्यालय प्रमुख रामसरण लामिछानेका अनुसार गोदाममा जिरा मसिनो, अरुवा मसिनो र अरुवा मोटो गरी १९ हजार क्विन्टल चामल स्टकमा रहेको छ। यसमध्ये जिरा मसिनो चामल पाँच हजार क्विन्टल, अरुवा मसिनो चामल पाँच हजार क्विन्टल र अरुवा मोटो चामल नौ हजार क्विन्टल रहेको उनले जानकारी दिए।
यसैगरी, चालु आर्थिक वर्षमा खरिद गरिएको तर कुटान बाँकी रहेको १० हजार क्विन्टल धान पनि मौज्दात रहेको छ।
कम्पनीले गोदाममा रहेको चामलको खुद्रा तथा थोक बिक्री गरिरहेको जनाएको छ। साथै पश्चिम नेपालको कर्णाली प्रदेशका जिल्लाहरूबाट माग आएमा आवश्यकताअनुसार आपूर्ति गर्ने व्यवस्था मिलाइएको बताइएको छ।
हालै चामलको मूल्य समायोजन भई प्रति क्विन्टल पाँच सयदेखि छ सय रुपैयाँसम्म घटेपछि बजारमा माग बढेको प्रमुख लामिछानेले बताए। गुणस्तरीय चामल उपलब्ध गराउने र स्थानीय बजारसँग प्रतिस्पर्धा गर्न मूल्य समायोजन गरिएको उनको भनाइ छ।
कर्णाली प्रदेशका हुम्ला, जुम्ला, कालिकोट, डोल्पा, मुगु र जाजरकोटस्थित खाद्य डिपोहरूमा पर्याप्त चामल मौज्दात रहेको र आवश्यक परे तत्काल आपूर्ति गर्न सकिने कम्पनीले जनाएको छ।
यस वर्ष बाँकेमा कम्पनीले २० हजार क्विन्टल धान खरिद गरेको थियो। कोटा सीमित भएकाले धेरै किसानको धान खरिद हुन नसकी फिर्ता गर्नुपरेको जनाइएको छ।
सरकारले यस वर्ष मोटा धान प्रतिक्विन्टल तीन हजार ४६३ रुपैयाँ ८१ पैसा र मध्यम धान प्रतिक्विन्टल तीन हजार ६२८ रुपैयाँ ३३ पैसामा खरिद मूल्य निर्धारण गरेको थियो।
Discussion about this post