बाँके चैत ४ गते ।
काठमाडौँ उपत्यकाका विभिन्न क्यासिनोमा अवैध रूपमा हारजित हुने गरी जुवातास खेल्दै आएका १४ जना नेपाली नागरिकलाई प्रहरीले पक्राउ गरेको छ।
जिल्ला प्रहरी परिसर काठमाडौँका अनुसार प्राप्त सूचनाका आधारमा खटिएको प्रहरी टोलीले बुढानिलकण्ठ नगरपालिका–१, तौलुङस्थित लेमन ट्री होटलभित्र रहेको गरुड क्यासिनोबाट १३ जना र काठमाडौँ महानगरपालिका–१४, सोल्टीमोडस्थित क्यासिनो माजोङबाट १ जनालाई नियन्त्रणमा लिएको हो।
प्रहरीले उनीहरूबाट नगद १ लाख ९० हजार, विभिन्न कम्पनीका १४ थान मोबाइल, मिलन प्रधान नामको नक्कली भारतीय आधार कार्ड १ थान, सवारी चालक अनुमति पत्र २ थान, नक्कली भारतीय मतदाता परिचयपत्र १ थान, सिसी क्यामेराको डिभीआर ३ थान तथा नेपाली खेलाडीहरूले विभिन्न मितिमा नगद साटेको विवरण रहेको एक थान इन्ट्री बुक बरामद गरेको जनाएको छ।
पक्राउ परेकामाथि जुवा सम्बन्धी कसूरमा थप अनुसन्धान भइरहेको जिल्ला प्रहरी परिसर काठमाडौँका प्रवक्ता प्रहरी उपरीक्षक पवनकुमार भट्टराईले जानकारी दिए ।
यस घटनासँगै देशका अन्य शहरहरूमा पनि क्यासिनो गतिविधिमाथि निगरानी आवश्यक रहेको देखिएको छ। विशेष गरी नेपालगन्ज क्षेत्रमा रहेका क्यासिनोहरूमा नेपाली नागरिक संलग्न भई जुवातास खेल्ने गरेको गुनासो पटक–पटक उठ्दै आएको छ। तर, त्यसतर्फ स्थानीय प्रशासन र प्रहरीको सक्रियता अपेक्षाकृत कमजोर रहेको जनगुनासो छ ।
Discussion about this post