बाँके चैत १५ गते।
नेकपा एमाले बाँकेले आफ्ना अध्यक्ष तथा पूर्वप्रधानमन्त्री केपी शर्मा ओली र पूर्वगृहमन्त्री रमेश लेखकको पक्राउलाई राजनीतिक प्रतिशोधको परिणाम भएको दाबी गर्दै सरकारलाई विरोधपत्र बुझाएको छ।
एमाले बाँकेले आइतबार प्रमुख जिल्ला अधिकारी दिलकुमार तामाङमार्फत सरकारसमक्ष विरोधपत्र पेश गर्दै दुवै नेतालाई बिना शर्त रिहा गर्न माग गरेको हो।
जिल्ला अध्यक्ष निरक गुरुङद्वारा बुझाइएको विरोधपत्रमा सरकारले राजनीतिक पूर्वाग्रहका आधारमा पक्राउ गरेको आरोप लगाइएको छ। साथै, कार्की आयोगले प्रतिशोधपूर्ण ढंगले प्रतिवेदन तयार गरेको उल्लेख गरिएको छ। एमालेले सो प्रतिवेदनमा भदौ २३ गतेको घटनामा संलग्न व्यक्तिहरूविरुद्ध कारबाहीबारे स्पष्ट उल्लेख नभएको भन्दै असन्तुष्टि जनाएको छ।
त्यस्तै, भदौ २४ गतेको घटनामा संलग्न व्यक्तिहरू नै हाल राज्यका उच्च पदमा रहेको दाबी गर्दै एमालेले यस अवस्थालाई कानुनी शासनको उपहास भएको जनाएको छ।
विरोधपत्र बुझाउनु अघि एमाले बाँकेले पासाङल्हामु मार्गबाट विरोध र्याली निकालेको थियो, जुन जिल्ला प्रशासन कार्यालयमा पुगेर समापन गरिएको थियो।
जिल्ला प्रशासन कार्यालय अगाडि प्रदर्शनकारीहरूले गृहमन्त्रीविरुद्ध नाराबाजी गरेका थिए। सम्भावित सुरक्षा जोखिमलाई ध्यानमा राख्दै प्रशासनले व्यापक सुरक्षाकर्मी परिचालन गरेको थियो।
यसैबीच, ओली र लेखकको पक्राउको विरोधमा एमाले निकट विभिन्न जनवर्गीय संगठनहरूले शनिबारदेखि नेपालगञ्जमा विरोध प्रदर्शन गर्दै आएका छन्।
Discussion about this post