बाँके चैत १५ गते।
नेपालगन्ज उप–महानगरपालिका–१२ कोरियनपुरस्थित सडकमा जलेर मृत्यु भएकी महिलाको पहिचान खुलेको छ। मृतक २२ वर्षीया सिर्जना बुढा मगर रहेको प्रहरीले जनाएको छ।
गएराति करिब ११ः३५ बजे एक महिला आगोले जलेको अवस्थामा रहेको भन्ने सूचना प्राप्त हुनासाथ प्रहरी टोली घटनास्थल पुगेको थियो। त्यहाँ ती महिला पूर्णरूपमा जलेको अवस्थामा फेला परेकी थिइन्।
गम्भीर घाइते अवस्थाकी उनलाई तत्काल उपचारका लागि भेरी अस्पताल पु¥याइएकोमा उपचारकै क्रममा राति १ः२० बजे चिकित्सकले मृत घोषणा गरेका थिए। प्रहरीका अनुसार उनी विवाहित थिइन् र उनका चार वर्षीया छोरी छन्।
प्रारम्भिक अनुसन्धानबाट सिर्जना श्रीमानसँग सम्बन्ध विच्छेद भएपछि विगत दुई वर्षदेखि २४ वर्षीय मो. आरिफ ढपालीसँग ‘लिभिङ टुगेदर’मा नेपालगन्जको रानितलाउ क्षेत्रमा कोठा भाडामा लिएर बस्दै आएको खुलेको छ। जिल्ला प्रहरी कार्यालय बाँकेका प्रवक्ता दीपक पातलीका अनुसार गएको शुक्रबार सिर्जनालाई आरिफले कुटपिट गरेको भन्ने उजुरी प्रहरीमा परेको थियो।
उक्त उजुरीका आधारमा प्रहरीले सोही दिन आरिफलाई पक्राउ गरी हिरासतमा राखेको र भोलिपल्ट आपसी सहमतिमा झै–झगडा नगर्ने सहमति भएपछि छाडिएको जानकारी दिएको छ। घटनास्थल भने मृतक बस्दै आएको कोठा नजिक नभई आरिफको घर नजिकै रहेको प्रहरीले जनाएको छ।
घटनाको वास्तविक कारण अझै खुल्न सकेको छैन। यस सम्बन्धमा प्रहरीले मो. आरिफ ढपाली, उनकी आमा र दिदीलाई नियन्त्रणमा लिएर थप अनुसन्धान गरिरहेको जनाएको छ। मृतकका आफन्तले जाहेरी दिएको र शवको पोस्टमार्टम प्रक्रिया जारी रहेको प्रहरीले जनाएको छ।
प्रहरीले घटना आत्महत्या हो वा हत्या भन्ने विषयमा विभिन्न कोणबाट अनुसन्धान भइरहेको बताउँदै सामाजिक सञ्जालमा समुदायबीच द्वन्द्व फैलाउने खालका टिप्पणी नगर्न तथा आधिकारिक स्रोतबाट पुष्टि गरेर मात्र सूचना सम्प्रेषण गर्न आग्रह गरेको छ।
Discussion about this post