बाँके वैशाख ११ गते ।
सशस्त्र प्रहरी बलले दुई दिनको अवधिमा १५ लाख ९६ हजार ६९७ रुपियाँ बराबरको अवैध सामान बरामद गरेको छ । सशस्त्र प्रहरी बल नेपाल नंं. ३० गण हेडक्वार्टर बागेश्वरी र मातहतका विओपीहरुले बैशाख १० र ११ गतेमा उक्त परिमाणको अवैध सामान बरामद गरेका हुन् ।
बरामद भएका सामानमा खसीको छाला, किराना सामान, पेय पदार्थ, फलफुल, जुत्ता, मोटरसाइकल, तरकारी, सुर्तिजन्य पदार्थ, एग्रोभेटका औषधी, दुध, ब्रोईलर कुखुरा, माछा रहेको सशस्त्र प्रहरीले जनाएको छ । उक्त सामान आवश्यक कारवाहीका लागि नेपालगन्ज भन्सार कार्यालय र पशु क्वारेन्टाइन कार्यालयलाई बुझाइएको छ ।
एसपी भीमबहादुर चन्दले सशस्त्र प्रहरी बल नेपाल नं. ३० गण हेडक्र्वाटर बागेश्वरीको कमाण्ड सम्हालेपछि सशस्त्र प्रहरीले भारतबाट भित्रिदै गरेका अवैध सामान धमाधम बरामद गरिरहेको छ । सशस्त्र प्रहरीले नाकामा कडाई गर्नुका साथै भारतबाट अवैध रुपमा भित्रिने सामानमा समेत कडा निगरानी गर्दै आएको छ ।
अवैध रुपमा भित्रिने सामान कुनै पनि हालतमा नछाड्न एसपी चन्दले निर्देशन दिएको एक अधिकृतले बताए । ‘अवैध रुपमा भारतबाट आउने सामानमाथि निगरानी गर्न र बरामद गर्न एसपी सावको कडा निर्देशन छ,’ ति अधिकृतले अनलाइन खोज खवरसँग भने ।
एसपी चन्दले अवैध रुपमा सामान भित्रिएको पाइए कारवाही गर्ने मातहतका प्रहरीलाई सचेत समेत गराएको सशस्त्र प्रहरी अधिकृत बताउँछन् । ‘जसको नाकाबाट अवैध सामान भित्रिन्छ त्यस क्षेत्रका विओपी इन्चार्ज र कर्मचारीलाई कारवाही हुने एसपी सावले सचेत गराउनु भएको छ,’ सशस्त्र प्रहरीका एक सहायक स्तरका अधिकृतले भने ।
Discussion about this post