सर्लाही वैशाख १२ गते ।
सर्लाहीका विभिन्न सीमा नाकामार्फत भारततर्फ तस्करी गरी पठाइएका चिनियाँ सामान भारतीय सुरक्षाकर्मीले नियन्त्रणमा लिएका छन्।
सखुअवा र संग्रामपुर नाका प्रयोग गरी भारत पुर्याइएको चिनियाँ लसुन र काँक्रोको बीउ भारतीय सशस्त्र सीमा बल (एसएसबी)को टोलीले बरामद गरेको हो।
शुक्रबार भारतको सीतामढी जिल्लाअन्तर्गत लालबन्दी नाकामा खटिएको एसएसबी टोलीले दुई वटा महिन्द्रा बोलेरो पिकअपमा ठूलो परिमाणमा सामान फेला पारेको जनाएको छ।
बरामद गरिएको चिनियाँ लसुन ६७ पोका अर्थात् करिब १ हजार २०६ किलोग्राम रहेको छ भने काँक्रोको बीउ ३ हजार ७२४ किलोग्राम बरामद गरिएको छ। तस्करीमा संलग्न दुई जना व्यक्ति तथा प्रयोग गरिएको सवारीसाधनसमेत नियन्त्रणमा लिई थप कारबाहीका लागि सोनबरसा भन्सार कार्यालय, सीतामढीमा बुझाइएको भारतीय पक्षले जनाएको छ।
सीमावर्ती क्षेत्रमा यति ठूलो परिमाणमा तस्करीका सामान फेला पर्नुले सर्लाही नाका हुँदै हुने अवैध कारोबार अझै सक्रिय रहेको संकेत गरेको छ। लामो समयदेखि सर्लाही जिल्ला तस्करीको प्रमुख मार्गका रूपमा चिनिँदै आएको छ।
Discussion about this post