सिरहा, साउन २० गते ।
सिरहाको लहान नगरपालिका–२२ सलोखरीबाट प्रहरीले पेस्तोल र म्याग्जिनसहित तीन जनालाई पक्राउ गरेको छ।
पक्राउ पर्नेमा लहान नगरपालिका–२२ सलोखरीका २० वर्षीय सबरजीत दास, २० वर्षीय गुरुदेव दास र १९ वर्षीय संजय दास रहेका छन्।
जिल्ला प्रहरी कार्यालय सिरहाका अनुसार बुधबार राति करिब ११ बजे प्रहरी चौकी सितापुरबाट खटिएको टोलीले नियमित गस्तीका क्रममा सलोखरीमा चेकजाँच गर्ने क्रममा सबरजीत दासले लगाएको पाइन्टको दाहिने गोजीबाट ९ एमएम जस्तो देखिने पेस्तोल र त्यसमा प्रयोग हुने म्याग्जिन बरामद गरेको हो।
प्रहरीले पेस्तोल बरामद भएपछि सबरजीतसँगै रहेका गुरुदेव र संजयलाई समेत नियन्त्रणमा लिएको जनाएको छ।
बरामद हतियारसहित तीनै जनालाई आवश्यक कानुनी प्रक्रिया पूरा गरी थप अनुसन्धानका लागि इलाका प्रहरी कार्यालय लहानमा ल्याइएको जिल्ला प्रहरी कार्यालय सिरहाले जनाएको छ।
घटनाबारे थप अनुसन्धान भइरहेको प्रहरी नायब उपरीक्षक एवं सूचना अधिकारी रमेशबहादुर पालले जानकारी दिए।
Discussion about this post