कपिलवस्तु, साउन २० गते ।
अदालत र प्रहरीमा आफ्नो पहुँच रहेको भन्दै जेलमा रहेका व्यक्तिलाई छुटाइदिने प्रलोभन देखाएर ५ लाख ६२ हजार रुपैयाँ ठगी गरेको आरोपमा कपिलवस्तु प्रहरीले एक जनालाई पक्राउ गरेको छ।
पक्राउ पर्नेमा शिवराज नगरपालिका–५ बालानगरका ३६ वर्षीय जग्गु तेली छन्। उनले बाणगंगा नगरपालिका–४ गजेहडाका ६५ वर्षीय अब्दुल मोविन मुसलमानका छोरा अकबर अलीको मुद्दा मिलाइदिने र कारागारबाट छुटाइदिने भन्दै विभिन्न मितिमा पटक–पटक गरी उक्त रकम लिएको प्रहरीले जनाएको छ।
जिल्ला प्रहरी कार्यालय कपिलवस्तुका प्रहरी उपरीक्षक मनोहर भट्टका अनुसार तेलीले अदालत र प्रहरीमा आफ्नो पहुँच रहेको दाबी गर्दै मुसलमानसँग रकम लिएका थिए।
अकबर अली २०८१ असोज ३० गते दर्ता भएको सवारी ज्यानसम्बन्धी कसुर मुद्दामा पुर्पक्षका लागि कारागार कार्यालय तौलिहवा चलान भएका थिए। उनी डेढ महिनाअघि कारागारबाट छुटेका थिए।
प्रहरीका अनुसार सोही मुद्दामा पुर्पक्षका लागि कारागारमा रहेका तेली भने २०८२ जेठ १ गते छुटेका थिए। जेलबाट छुटेपछि उनले अकबर अलीका बुवालाई भेटेर छोरालाई मुद्दाबाट छुटाइदिने भन्दै रकम मागेको प्रहरीको भनाइ छ।
जिल्ला प्रहरी कार्यालय कपिलवस्तुका सूचना अधिकारी प्रहरी नायब उपरीक्षक रिपेन्द्रकुमार सिंहका अनुसार तेलीले विभिन्न सरकारी निकायमा आफ्नो चिनजान र प्रभाव रहेको दाबी गर्दै पीडितलाई विश्वासमा पारेका थिए।
पीडितले जिल्ला प्रहरी कार्यालय कपिलवस्तुमा जाहेरी दिएपछि प्रहरीले अनुसन्धान अघि बढाएको थियो। अनुसन्धानका क्रममा जिल्ला प्रहरी कार्यालय कपिलवस्तु र इलाका प्रहरी कार्यालय बहादुरगञ्जबाट खटिएको संयुक्त प्रहरी टोलीले तेलीलाई शिवराज नगरपालिका–७ रुपपुर क्षेत्रबाट पक्राउ गरेको हो।
प्रहरीले तेलीविरुद्ध ठगी, आपराधिक विश्वासघात तथा आपराधिक लाभ (एक्सटर्सन) सम्बन्धी कसुरमा अनुसन्धान अघि बढाएको जनाएको छ। कपिलवस्तु जिल्ला अदालतबाट पाँच दिनको म्याद थप अनुमति लिएर उनीमाथि थप अनुसन्धान भइरहेको प्रहरीले जनाएको छ।
Discussion about this post