बाँके वैशाख २९ गते ।
आगामी जेठ २ गते शनिवारका दिन नेपालगन्जमा बृहद निशुल्क स्वास्थ्य शिविर हुने भएको छ । लाइफ लाइन जनरल हस्पिटल, परिवर्तन समुह र नेपाल चिकित्सक संघको संयुक्त आयोजनामा निशुल्क स्वास्थ्य शिविर संचालन हुने भएको हो ।
विपी चोकस्थित गुरुद्वारामा हुने स्वास्थ्य शिविरमा विभिन्न विशेषज्ञ चिकित्सकले स्वास्थ्य परिक्षण गर्नुका सार्थ मधुमेश (सुगरं), उच्च रक्तचाप (प्रेसर), थाइराइड, कोलस्ट्रोल, यूरिक एसिड लगायतको निशुल्क परिक्षण हुने गणपति डेन्टल क्लिनिकका डा. प्रतिक श्रेष्ठले जानकारी दिए । ‘शिविरमा क्यान्सर, थाइराइड, हाडजोर्नी, उच्च रक्तचाप, सुगर, मिर्गौला, पेट, दन्त, आँखा लगायत १० जना विशेषज्ञ चिकित्सकले विरामीको स्वास्थ्य परिक्षण गर्ने कार्यक्रम छ,’ उनले भने, ‘शिविरमा दिसा, पिसावको निशुल्क जाँच गरि विरामीलाई निशुल्क औषधि वितरण गर्ने कार्यक्रम छ ।’
स्वास्थ्य शिविरमा रक्तदान कार्यक्रम समेत राखिएको छ ।
सुदूरपश्चिम, कर्णाली र लुम्बिनी प्रदेशका विरामीलाई रगत अभाव हुने भएकोले बृहद रक्तदान कार्यक्रम राखिएको डा. श्रेष्ठले जानकारी दिए । उनले शिविरमा आएर फाइदा लिन चुले निम्तोसमेत दिएका छन् । ‘शल्यक्रिया र प्रसुतिका विरामीलाई रगत अभाव भएकोले नेपाल रेडक्रस सोसाइटीसँगको सहकार्यमा रक्तदान कार्यक्रम राखेका छौँ,’ उनले भने, ‘रक्तदान कार्यक्रमले नेपालगन्जमा हुने रगत अभाव समस्यालाई केहि हदसम्म न्यूनिकरण गर्ने आशा लिएका छौँ ।’
आर्थिक अभावका कारण अस्पतालमा गएर उपचार गराउन नसक्ने विरामी तथा सर्वसाधारणलाई लक्षित गरि स्वास्थ्य शिविर आयोजना गरिएको परिवर्तन समुहका सचिव समेत रहेका शिविर संचालक समितिका संयोजक सौरभ कर्माचार्यले बताए । ‘स्वास्थ्य सेवाको पहुँचभन्दा बाहिर रहेका विरामीले सहज तथा निशुल्क रुपमा उपचार पाउन भन्ने शिविरको मुख्य उद्देश्य हो,’ उनले भने ।
उनले नेपालगन्जमा पश्चिम नेपालका विरामी आउने भएकोले समय समयमा रगत अभाव हुने गरेको बताए । ‘रगत अभाव समस्यालाई न्यूनिकरण गर्न रक्तदान कार्यक्रम पनि राखेका छौँ,’ कर्माचार्यले भने ।
Discussion about this post