बाँके जेठ ४ गते ।
विश्व सडक सुरक्षा सप्ताहको अवसरमा बाँकेमा सञ्चालन गरिएको विशेष सवारी चेकजाँच अभियानका क्रममा लागुऔषध सेवन गरेर सवारी साधन चलाउने १४ जना पक्राउ परेका छन् ।
इलाका प्रहरी कार्यालय कोहलपुर र जिल्ला ट्राफिक कार्यालय बाँकेले संयुक्त रूपमा सञ्चालन गरेको अभियानअन्तर्गत नेपालगन्जको राँझा क्षेत्रमा चेकजाँच गरिएको थियो ।
अभियानका क्रममा सार्वजनिक बस, इभी गाडी, अटो, मोटरसाइकल तथा स्कुटी चालकसहित केही यात्रु गरी २४ जनाको परीक्षण गरिएको थियो । परीक्षणमा १४ जनाले लागुऔषध सेवन गरेको पुष्टि भएपछि उनीहरूलाई नियन्त्रणमा लिइएको जिल्ला ट्राफिक कार्यालय बाँकेका प्रमुख प्रहरी निरीक्षक कनकबहादुर शाहीले जानकारी दिए ।
प्रहरीका अनुसार मल्टिपल ड्रग टेस्ट किटमार्फत स्वास्थ्य परीक्षण गरिएको हो । पक्राउ परेकाहरूलाई हाल इलाका प्रहरी कार्यालय कोहलपुरको हिरासतमा राखिएको छ । उनीहरू केवल सेवनकर्ता हुन् वा लागुऔषध कारोबारमा समेत संलग्न छन् भन्ने विषयमा थप अनुसन्धान भइरहेको प्रहरीले जनाएको छ ।
अनुसन्धानबाट प्राप्त निष्कर्षका आधारमा आवश्यक कानुनी प्रक्रिया अघि बढाइने बताइएको छ । प्रमुख शाहीका अनुसार पछिल्लो समय लागुऔषध सेवनपछि सवारी चलाउने प्रवृत्ति बढ्दै जाँदा सडक सुरक्षा थप चुनौतीपूर्ण बन्दै गएको छ । उनले सडक दुर्घटनाका प्रमुख कारणमध्ये मादक पदार्थ तथा लागुऔषध सेवन पनि एक रहेको उल्लेख गरे ।
लागुऔषध सेवन गरी सवारी चलाउने प्रवृत्ति नियन्त्रण गर्न प्रविधिमैत्री परीक्षणलाई निरन्तरता दिइने प्रहरीले जनाएको छ । विश्व सडक सुरक्षा सप्ताहको अवसरमा यसअघि नेपालगन्जमा चालक तथा सहचालक लक्षित स्वास्थ्य शिविर तथा सार्वजनिक सवारी साधन अनुगमन कार्यक्रमसमेत सञ्चालन गरिएको थियो ।
Discussion about this post