बाँके, जेठ ५ गते ।
बाँके जिल्ला स्तरीय मेयर कप अन्तरविद्यालय (यू–१८) छात्र–छात्रा फुटबल प्रतियोगिता २०८३ आगामी जेठ २३ गतेदेखि सुरु हुने भएको छ । बाँके जिल्ला फुटबल सङ्घको आयोजनामा हरेक वर्ष सञ्चालन हुँदै आएको प्रतियोगितामा यस वर्ष पनि जिल्लाका आठवटै स्थानीय तहका विद्यालयहरूको सहभागिता रहने जनाइएको छ ।
नेपालगन्ज रङ्गशालामा एक सातासम्म सञ्चालन हुने प्रतियोगिता नेपालगन्ज उपमहानगरपालिकाको आर्थिक सहयोगमा आयोजना हुन लागेको हो । आयोजकका अनुसार प्रतियोगितामा करिब ३० वटा विद्यालय सहभागी हुने अपेक्षा गरिएको छ ।
बाँके जिल्ला फुटबल सङ्घका अध्यक्ष तथा अखिल नेपाल फुटबल सङ्घ (एन्फा) का केन्द्रीय सदस्य भोजराज शाहीले विद्यालय तहबाट प्रतिभावान खेलाडी उत्पादन गर्न मेयर कपले महत्वपूर्ण भूमिका खेल्दै आएको बताए । उनले दुई दशकदेखि निरन्तर आयोजना हुँदै आएको प्रतियोगिताले जिल्लाको फुटबल विकासमा सकारात्मक योगदान पु¥याएको उल्लेख गरे ।
सङ्घका महासचिव कमल खत्रीले विद्यालयस्तरका प्रतियोगिताले हरेक वर्ष नयाँ खेलाडी उत्पादनमा सहयोग गर्ने भएकाले मेयर कपलाई प्राथमिकताका साथ आयोजना गर्दै आएको बताए । उनले प्रतियोगिताले बाँकेको फुटबल स्तर उकास्न समेत मद्दत पुगेको धारणा राखे ।
आयोजकका अनुसार प्रतियोगिताको पुरस्कार राशी चाँडै सार्वजनिक गरिनेछ । साथै, प्रतियोगितामा सर्वोत्कृष्ट खेलाडी, उत्कृष्ट गोलकिपर, उत्कृष्ट रक्षक, उत्कृष्ट मिडफिल्डर तथा उत्कृष्ट स्ट्राइकरलाई पनि पुरस्कृत गरिने जनाएको छ ।
गत वर्ष सम्पन्न प्रतियोगितामा पुरुषतर्फ ब्राइटल्यान्ड स्कुल र महिलातर्फ नेपालगन्ज सेन्ट जेभियर्स स्कुल च्याम्पियन बनेका थिए । पुरुषतर्फ ब्राइटल्यान्डले सडनडेथमा कोहलपुरको ग्रिनपिस माविलाई पराजित गर्दै उपाधि जितेको थियो भने महिलातर्फ नेपालगन्ज सेन्ट जेभियर्सले आदर्श मावि नेपालगन्जलाई ४–० गोल अन्तरले हराएको थियो ।
त्यसैगरी, गत संस्करणमा पुरुषतर्फ ब्राइटल्यान्डका सिरिस रावत तथा महिलातर्फ नेपालगन्ज सेन्ट जेभियर्सकी सृष्टि थारु सर्वोत्कृष्ट खेलाडी घोषित भएका थिए ।
Discussion about this post