बाँके, जेठ ४ गते ।
नेपाल सरकारले भारतबाट एक सय रुपियाँभन्दा बढी मूल्यका सामान ल्याउँदा अनिवार्य रूपमा भन्सार महसुल तिर्नुपर्ने व्यवस्था कडाइका साथ लागू गरेपछि नेपाल–भारत सीमावर्ती क्षेत्रमा व्यापारिक गतिविधिमा उल्लेख्य गिरावट आएको छ ।
नेपालगन्जको जमुनाह नाकासँग जोडिएको भारतीय बजार रुपैडिहास्थित रुपैडिहा उद्योग व्यापार प्रतिनिधि मण्डल (बहराइच) ले नयाँ भन्सार नीतिका कारण सीमापार व्यापार करिब ७५ प्रतिशतसम्म घटेको दाबी गर्दै उक्त नीति पुनरावलोकन गर्न माग गरेको छ ।
मण्डलले नेपाल सरकारको कडाइका कारण रुपैडिहा क्षेत्रमा व्यापारिक संकट उत्पन्न भएको उल्लेख गर्दै जिल्ला प्रशासन बहराइचमार्फत भारत सरकारलाई ध्यानाकर्षण पत्र बुझाएको जनाएको छ ।
मण्डलका नगर अध्यक्ष शैलेश जायसवालले जिल्ला अधिकारीसमक्ष बुझाएको पत्रमा नेपाल सरकारले एक सय रुपियाँभन्दा बढी मूल्यका सामानमा भन्सार शुल्क कडाइका साथ लागू गरेपछि रुपैडिहा तथा आसपासका सीमावर्ती बजारका व्यापारी प्रत्यक्ष रूपमा प्रभावित भएको उल्लेख गरिएको छ ।
उनका अनुसार यसअघि दैनिक उपभोग्य वस्तुको सहज आवतजावत हुने गरे पनि हाल चामल, चिनी, खाने तेल, औषधि तथा तरकारीजस्ता सामग्रीमा समेत कडाइ गरिएकाले सीमापार किनमेल र व्यापार उल्लेख्य रूपमा घटेको छ ।
मण्डलले उक्त नीतिका कारण भारतीय व्यापारी आर्थिक रूपमा प्रभावित हुनुका साथै दुई देशबीचको परम्परागत व्यापारिक सम्बन्धमा समेत असर परेको जनाएको छ । पत्रमा सीमामा सशस्त्र प्रहरीद्वारा गरिएको निगरानी र कडाइले सर्वसाधारण तथा व्यापारी दुवैलाई असहज भएको उल्लेख छ ।
त्यसैगरी, मण्डलले भारत सरकारसँग कूटनीतिक पहलमार्फत एक सय रुपियाँभन्दा बढी मूल्यका सामानमा गरिएको कडाइ खुकुलो बनाउन आग्रह गरेको छ । सीमा क्षेत्रको पुरानो व्यापारिक तथा सामाजिक सम्बन्ध कायम राख्न दुवै पक्षले सहकार्य र संवादमार्फत समाधान खोज्नुपर्नेमा पनि जोड दिइएको छ ।
यता, नाकामा कडाइ बढेपछि बाँके, बर्दिया तथा दाङबाट रुपैडिहा किनमेलका लागि जाने उपभोक्ताको संख्या समेत घटेको छ । यसको प्रभावस्वरूप सीमापार व्यापार घटे पनि नेपाली बजारमा भने व्यापारिक गतिविधि बढ्न थालेको नेपालगन्ज उद्योग वाणिज्य संघले जनाएको छ ।
संघका अध्यक्ष टंक धामीले नाकामा गरिएको कडाइलाई निरन्तरता दिनुपर्ने धारणा व्यक्त गरे । उनका अनुसार यसले नेपालगन्ज र कोहलपुरका बजार मात्र नभई पहाडी जिल्लाका व्यापारिक केन्द्रहरूमा समेत सकारात्मक प्रभाव पार्न थालेको छ ।
Discussion about this post