बाँके, जेठ ७ गते ।
गत एक सातादेखि पश्चिम नेपालको तराई क्षेत्रमा अत्यधिक गर्मी र तातो हावा ‘लु’ चल्न थालेपछि जनजीवन प्रभावित बनेको छ । बाँकेसहित नेपालगञ्ज र आसपासका क्षेत्रमा तापक्रम निरन्तर बढ्दै जाँदा सर्वसाधारणको दैनिकी कष्टकर बन्दै गएको हो ।
बिहानैदेखि चर्को घाम लाग्ने र दिनभर शरीर पोल्ने तातो हावा चल्ने क्रम बढेपछि दिउँसोको समयमा बजार, सडक तथा ग्रामीण क्षेत्र सुनसानजस्तै देखिन थालेका छन् । अत्यधिक गर्मीका कारण मानिसहरूको हिँड्डुलसमेत उल्लेख्य रूपमा घटेको स्थानीयले बताएका छन् ।
नेपालगञ्ज नागरिक सरोकार मञ्चका संयोजक कृष्णप्रसाद श्रेष्ठले पछिल्ला दिनमा एक्कासि बढेको गर्मी र ‘लु’ले स्थानीयवासीको जनजीवन प्रभावित बनेको बताए । उनका अनुसार अत्यधिक तापका कारण बिहान र साँझबाहेक बाहिर निस्कन कठिन भइरहेको छ ।
नेपालगञ्ज उपमहानगरपालिका–११ का वडाध्यक्ष नन्दकिशोर कश्यपले गर्मीका कारण दिउँसो सेवाग्राहीको चहलपहलसमेत घटेको जानकारी दिए ।
अत्यधिक गर्मीबाट दैनिक ज्यालादारी गरेर जीविकोपार्जन गर्ने मजदुर तथा श्रमिक वर्ग सबैभन्दा बढी प्रभावित भएका छन् । अटोरिक्सा चालक, ठेलाचालक तथा अन्य श्रमिकले गर्मीका कारण नियमित काम गर्न कठिनाइ भइरहेको बताएका छन् ।
नेपालगञ्ज–११ का अटोरिक्सा चालक नन्कु शेषले अत्यधिक गर्मीका कारण बिहान र साँझबाहेक अटो चलाउन कठिन हुने गरेको बताए । उनले दिउँसो सडकमा यात्रु तथा सवारीसाधनको चहलपहलसमेत न्यून हुने गरेको उल्लेख गरे ।
अन्य समयमा व्यस्त रहने बजार क्षेत्रका सडक र चोकमा अहिले अटोरिक्साको उपस्थितिसमेत पातलो देखिन थालेको छ ।
यसैबीच, मौसम पूर्वानुमान महाशाखाले लुम्बिनी प्रदेशका तराई क्षेत्रमा आगामी केही दिनसम्म तातो हावा तथा तातो लहरको प्रभाव रहने जनाएको छ । बाँके, बर्दिया, कपिलवस्तु र रूपन्देहीलगायतका जिल्ला अत्यधिक गर्मीबाट बढी प्रभावित हुने सूचीमा रहेका छन् ।
चिकित्सकहरूले अत्यधिक गर्मीबाट जोगिन दिउँसोको समयमा सकेसम्म बाहिर ननिस्कन, चिसो स्थानमा बस्न तथा अत्यावश्यक अवस्थामा मात्र बाहिर निस्कँदा टाउको छोप्ने, टोपी प्रयोग गर्ने र हल्का सुती कपडा लगाउन सुझाव दिएका छन् ।
भेरी अस्पतालका सूचना अधिकारी वरिष्ठ चिकित्सक डा. सङ्केतकुमार रिसालले शरीरमा पानीको कमी हुन नदिन पर्याप्त मात्रामा पानी, जुस तथा अन्य झोल पदार्थ नियमित सेवन गर्न आग्रह गरेका छन् ।
Discussion about this post