बाँके, जेठ १६ गते।
बाँकेको राप्ती सोनारी गाउँपालिका–७ फत्तेपुरस्थित खल्लाझगडियामा निर्माणाधीन स्थायी तटबन्धको बाँकेका प्रमुख जिल्ला अधिकारीसहित उच्च अधिकारीहरूको टोलीले स्थलगत निरीक्षण गरेको छ।
जनताको तटबन्ध आयोजना कार्यालय, लमहीका प्रमुख निश्चल छतकुलीका अनुसार प्रमुख जिल्ला अधिकारी दिलकुमार तामाङ, जिल्ला प्रहरी कार्यालय बाँकेका प्रमुख प्रहरी उपरीक्षक अङ्गुर जिसीलगायत आयोजना कार्यालयका उच्च अधिकारी र प्राविधिकहरूको टोलीले निर्माणस्थलको निरीक्षण गरेको हो।
निरीक्षणका क्रममा अधिकारीहरूले निर्माण कार्यको प्रगति समीक्षा गर्दै वर्षायाममा बाढीको जोखिम बढ्नुअघि नै तटबन्ध निर्माण सम्पन्न गर्न निर्माण कम्पनीलाई निर्देशन दिएका छन्। आयोजना प्रमुख छतकुलीले वर्षा सुरु हुनुअघि नै काम सम्पन्न गर्ने लक्ष्यका साथ निर्माण कार्य तीव्र गतिमा अघि बढाइएको जानकारी दिए।
दुई वर्षअघि राप्ती नदीमा आएको बाढीले तटबन्ध भत्काएपछि उक्त क्षेत्रमा कटान र डुबानको समस्या बढेको थियो। त्यसयता स्थानीयवासीले स्थायी तटबन्ध निर्माणको माग गर्दै आएका थिए। गत वर्ष कटान नियन्त्रणका लागि बाँस तथा बालुवाका बोराको प्रयोग गरी अस्थायी तटबन्ध निर्माण गरिएको थियो।
निर्माणस्थलमै पुगेका प्रमुख जिल्ला अधिकारी तामाङले वर्षा र बाढीको जोखिम सुरु हुनुअघि नै तटबन्ध निर्माण सम्पन्न गर्न निर्माण कम्पनीलाई स्पष्ट निर्देशन दिइएको बताए। उनका अनुसार निर्माण कम्पनी साइमा दुर्गा जेभीका प्रतिनिधि राजबहादुर शाहीले निर्धारित समयभित्रै निर्माण कार्य सम्पन्न गर्ने प्रतिबद्धता व्यक्त गरेका छन्।
निरीक्षणका क्रममा आयोजना प्रमुख छतकुली र कम्पनीका प्रतिनिधि शाहीले निर्माण कार्यको प्रगति, बाँकी काम तथा निर्धारित समयसीमाभित्र लक्ष्य पूरा गर्ने योजनाबारे विस्तृत जानकारी गराएका थिए।
करिब पाँच करोड रुपैयाँ लागतमा निर्माण भइरहेको ५०० मिटर लामो उक्त स्थायी तटबन्ध आगामी असोजसम्म सम्पन्न गर्ने लक्ष्यसहित साइमा दुर्गा जेभीले गत वर्ष ठेक्का सम्झौता गरेको थियो। तटबन्ध निर्माण सम्पन्न भएपछि फत्तेपुर क्षेत्रका बस्ती तथा कृषि योग्य जमिनलाई बाढीजन्य कटान र डुबानबाट दीर्घकालीन संरक्षण पुग्ने अपेक्षा गरिएको छ।
Discussion about this post