बर्दिया, जेठ १६ गते ।
बर्दियाको बढैयाताल गाउँपालिका–२ फुटाहा क्षेत्रमा भारतबाट अवैध रूपमा नेपाल भित्र्याइएको ठूलो परिमाणको चिनी प्रहरीले बरामद गरेको छ।
शनिबार अपराह्न करिब ३:२० बजे लुम्बिनी प्रदेश प्रहरी कार्यालयबाट खटिएको प्रहरी टोलीले गोठलाई गोदामका रूपमा प्रयोग गरी बेवारिसे अवस्थामा थुपारेर राखिएको ३२ बोरा चिनी फेला पारेको हो।
बरामद गरिएको चिनीको तौल करिब १६ क्विन्टल रहेको र यसको अनुमानित मूल्य १ लाख ५२ हजार रुपैयाँ रहेको प्रहरीले जनाएको छ।
प्रहरीले उक्त चिनी नियन्त्रणमा लिएर आवश्यक अनुसन्धान तथा थप कारबाहीका लागि प्रहरी चौकी जमुनी, बर्दियामा बुझाएको जनाएको छ।
हालका दिनहरूमा लुम्बिनी प्रदेश प्रहरी कार्यालयको ब्यूरो टोलीले सीमावर्ती क्षेत्रमा हुने तस्करी तथा अवैध कारोबार नियन्त्रणका लागि निगरानी र कारबाहीलाई तीव्र बनाएको छ। प्रहरीले यस्ता गतिविधिविरुद्ध थप प्रभावकारी रूपमा अभियान सञ्चालन गरिरहेको जनाएको छ।
Discussion about this post