बाँके, जेठ १८ गते ।
बाँकेमा आगामी जेठ २३ र २४ गते तेस्रो मेयर कप राष्ट्रिय स्ट्रेन्थलिफ्टिङ तथा आइबिपी च्याम्पियनसिप–२०८३ आयोजना हुने भएको छ। प्रतियोगिताको सम्पूर्ण तयारी पूरा भएको आयोजकले जनाएको छ।
बाँके जिल्ला स्ट्रेन्थलिफ्टिङ सङ्घको आयोजनामा नेपालगञ्ज रङ्गशालास्थित कभर्ड हलमा सञ्चालन हुने प्रतियोगितामा देशभरका महिला तथा पुरुष खेलाडीको सहभागिता रहनेछ।
प्रतियोगितामा इन्क्लाइन बेञ्च प्रेस, ह्याक लिफ्ट तथा टु–ह्यान्ड बार्बेल कर्ल गरी तीन विधामा प्रतिस्पर्धा हुने सङ्घका अध्यक्ष विनी टण्डनले जानकारी दिए। उनका अनुसार प्रतियोगिता नेपाल स्ट्रेन्थलिफ्टिङ फेडेरेसनको संयोजन तथा वल्र्ड स्ट्रेन्थलिफ्टिङ फेडेरेसनको आबद्धतामा सञ्चालन हुनेछ। प्रत्येक खेलाडीलाई हरेक विधामा तीन–तीन अवसर प्रदान गरिने व्यवस्था गरिएको छ।
प्रतियोगितामा सब–जुनियर मेनतर्फ १३ देखि १८ वर्ष उमेर समूहका खेलाडी सहभागी हुनेछन् भने जुनियर मेनतर्फ १९ देखि २३ वर्ष उमेर समूहका खेलाडीबीच प्रतिस्पर्धा हुनेछ। त्यसैगरी, सिनियर मेनतर्फ ६० केजीमुनि, ६८ केजीमुनि, ७६ केजीमुनि, ८५ केजीमुनि र ८५ केजीमाथि गरी विभिन्न तौल समूहमा प्रतिस्पर्धा गराइनेछ।
मास्टर मेन–१ अन्तर्गत ४० देखि ५० वर्ष उमेर समूह र मास्टर मेन–२ अन्तर्गत ५० वर्षमाथिका खेलाडी सहभागी हुनेछन्। महिला सिनियरतर्फ भने ६० केजीमुनि र ६० केजीमाथि गरी दुई तौल समूहमा प्रतिस्पर्धा आयोजना गरिने आयोजकले जनाएको छ।
बाँके जिल्ला स्ट्रेन्थलिफ्टिङ सङ्घका सचिव चन्द्रशेखर थापाले राष्ट्रिय स्तरका खेलाडीलाई एउटै मञ्चमा प्रतिस्पर्धा गराउने उद्देश्यले प्रतियोगिता आयोजना गरिएको बताए। उत्कृष्ट प्रदर्शन गर्ने खेलाडीलाई नगद पुरस्कारसहित सम्मान गरिने उनले जानकारी दिए।
प्रतियोगितालाई थप आकर्षक र स्मरणीय बनाउन नेपाली खेलकुद क्षेत्रमा उल्लेखनीय योगदान पु¥याएका चार जना ओलम्पियन खेलाडीलाई विशेष सम्मान गर्ने कार्यक्रमसमेत राखिएको छ।
सम्मानित हुने खेलाडीमा सन् १९८४ मा अमेरिकाको लस एन्जलसमा सम्पन्न २३औँ ओलम्पिकमा सहभागी सुरेन्द्रबहादुर हमाल, सन् १९८८ को सियोल ओलम्पिकमा सहभागी पार्वती थापा, सन् १९९२ को बार्सिलोना ओलम्पिकमा सहभागी अनिता श्रेष्ठ तथा सन् २०२० को टोकियो ओलम्पिकमा सहभागी सोनिया भट्ट रहेका छन्।
आयोजकका अनुसार प्रतियोगिताले स्ट्रेन्थलिफ्टिङ खेलको विकास, खेलाडीको क्षमता अभिवृद्धि तथा राष्ट्रिय स्तरमा खेलकुद गतिविधिको प्रवर्द्धनमा महत्वपूर्ण योगदान पुर्याउने अपेक्षा गरिएको छ।
Discussion about this post