बाँके, जेठ १७ गते ।
जिल्ला ट्राफिक प्रहरी कार्यालय कोहलपुरले सडक सुरक्षा अभिवृद्धि तथा सवारी साधनको पहिचानलाई सहज बनाउन सञ्चालन गरेको साता व्यापी विशेष अभियानअन्तर्गत १ हजार १ सय ६१ वटा सवारी साधनमा नम्बर प्लेट स्पष्ट रूपमा लेख्न लगाएको छ।
अभियानका क्रममा नम्बर प्लेट मेटिएका, अस्पष्ट देखिएका तथा ‘अन टेस्ट’ लेखिएका सवारी साधनलाई रोकि चालकलाई सचेत गराउँदै तत्काल नम्बर प्लेट स्पष्ट बनाउन लगाइएको जिल्ला ट्राफिक प्रहरी कार्यालय बाँकेका प्रमुख प्रहरी निरीक्षक कनकबहादुर शाहीले जानकारी दिए।
उनका अनुसार जिल्ला ट्राफिक प्रहरी कार्यालय तथा मातहतका इकाइहरूले बाँकेभित्र सञ्चालनमा रहेका र विभिन्न जिल्लाबाट आवतजावत गर्ने सवारी साधनमा विशेष निगरानी गरी पुराना तथा स्पष्ट नदेखिने नम्बर प्लेट भएका सवारी साधनलाई सडकमै आवश्यक परामर्श दिई नम्बर लेख्न लगाएका हुन्।
प्रहरी निरीक्षक शाहीले सवारी साधनमा नम्बर प्लेट स्पष्ट नहुँदा दुर्घटना अनुसन्धान, सवारी साधनको पहिचान तथा कानुनी कारबाहीमा समस्या हुने भएकाले अभियान सञ्चालन गरिएको बताए। उनका अनुसार अभियानको क्रममा चालक तथा सवारीधनीलाई ट्राफिक नियमसम्बन्धी सचेतना तथा प्रशिक्षणसमेत प्रदान गरिएको छ।
सडक दुर्घटना न्यूनीकरण र सवारी व्यवस्थापनलाई प्रभावकारी बनाउन जिल्लाभर ट्राफिक निगरानी तथा नियम कार्यान्वयनलाई थप कडाइ गरिएको उनले बताए। विशेषगरी नियमविपरीत सञ्चालनमा रहेका तथा नम्बर प्लेट अस्पष्ट भएका सवारी साधनलाई लक्षित गरी अभियान सञ्चालन गरिएको र यसले दुर्घटना न्यूनीकरणसँगै सवारी साधनको पहिचान प्रक्रियालाई सहज बनाउने अपेक्षा गरिएको छ।
ट्राफिक प्रहरीले सबै चालकलाई ट्राफिक नियमको पूर्ण पालना गर्न, सवारी साधनको प्राविधिक अवस्था नियमित रूपमा जाँच गर्न तथा सुरक्षित यात्रामा विशेष ध्यान दिन आग्रह गरेको छ।
Discussion about this post