बाँके, जेठ २३ गते ।
नेपालगन्ज तथा आसपासका क्षेत्रमा एक सातादेखि चलिरहेको तातो हावा (लु) र बढ्दो तापक्रमका कारण झाडापखाला, ज्वरो तथा छालासम्बन्धी रोगका बिरामीको सङ्ख्या उल्लेख्य रूपमा बढ्न थालेको छ। जिल्लाका सरकारी तथा निजी अस्पतालहरूमा उपचारका लागि पुग्ने बिरामीको चाप बढ्दै गएको स्वास्थ्यकर्मीहरूले बताएका छन्।
देशकै अत्यधिक गर्मी हुने स्थानमध्ये एक मानिने नेपालगन्जमा पछिल्ला दिनहरूमा तापक्रम निरन्तर बढेपछि स्वास्थ्य समस्या देखिने नागरिकको सङ्ख्या वृद्धि भएको हो। भेरी अस्पतालका सूचना अधिकारी तथा वरिष्ठ फिजिसियन डा. सङ्केतकुमार रिसालका अनुसार केही दिनयता पखाला, ज्वरो, रुघाखोकी तथा छालासम्बन्धी विभिन्न समस्या भएका बिरामी अस्पतालमा आउने क्रम बढेको छ। अत्यधिक गर्मीका कारण रक्तचापमा उतारचढाव हुने, शरीरमा पानीको कमी हुने तथा विभिन्न संक्रमणजन्य समस्या देखिने गरेको उनले बताए।
यसैगरी, सञ्जीवनी मेडिकल साइन्सेज प्रालिको नेपालगन्ज शिक्षण अस्पतालका मेडिकल सुपरिटेन्डेन्ट डा. रोमन किदवाइले अस्पतालमा आउने अधिकांश बिरामी गर्मीजन्य समस्याबाट प्रभावित रहेको जानकारी दिए। विशेषगरी बालबालिका सबैभन्दा बढी प्रभावित भएको उनको भनाइ छ।
स्वास्थ्य कार्यालय बाँकेका प्रमुख सुनिता पौडेलले जिल्लाभरका स्वास्थ्य संस्था, अस्पताल तथा निजी क्लिनिकहरूमा गर्मीका कारण बिरामी हुनेको सङ्ख्या ह्वात्तै बढेको जानकारी आएको बताइन्। बालबालिका, वृद्धवृद्धा तथा दीर्घरोगीहरू बढी जोखिममा रहेको उल्लेख गर्दै उनले सबै स्वास्थ्य संस्थालाई सम्भावित बिरामीको चाप व्यवस्थापनका लागि तयारी अवस्थामा रहन निर्देशन दिइएको जानकारी दिइन्।
चिकित्सकहरूले अत्यावश्यक कामबाहेक दिउँसो घरबाहिर ननिस्कन, प्रशस्त पानी पिउन तथा गर्मीबाट बच्ने उपाय अपनाउन सर्वसाधारणलाई आग्रह गरेका छन्।
Discussion about this post