बर्दिया, जेठ २५ गते ।
लुम्बिनी प्रदेश प्रहरी कार्यालयको ब्यूरो टोलीले बर्दियामा सञ्चालन गरेको विशेष निगरानी तथा सूचनाको आधारमा गरेको कारबाहीमा ४३ लाख ६१ हजार ८४० रुपैयाँभन्दा बढी मूल्यका अवैध भन्सार छलीका सामान तथा सवारी साधन बरामद गरेको छ।
प्रहरीका अनुसार मधुबन नगरपालिका–८, सानोश्री क्षेत्रमा भारतबाट नेपालतर्फ अवैध रूपमा भन्सार छली गरी ल्याइँदै गरेको अवस्थामा दुई जना भारतीय नागरिकसहित दुई वटा बोलेरो गाडी, एक मोटरसाइकल र ठूलो परिमाणमा केरा नियन्त्रणमा लिइएको हो।
नियन्त्रणमा परेकामध्ये भारतको बहराइच जिल्ला, फकलपुर गाउँका २२ वर्षीय रिजवान अन्सारी र २० वर्षीय कलिम खान रहेका छन्। उनीहरूसँगै लु.१ च ९१५९ र भे.१ च ३५८० नम्बरका दुई वटा बोलेरो गाडी, भे.१२ प ९९२१ नम्बरको १५० सीसी पल्सर मोटरसाइकल तथा ३ हजार ७९० दर्जन केरा बरामद गरिएको प्रहरीले जनाएको छ।
बरामद गरिएका सवारी साधन र केराको अनुमानित मूल्य २५ लाख ५९ हजार रुपैयाँ रहेको छ। उक्त सामान तथा व्यक्तिहरूलाई आवश्यक अनुसन्धान तथा कानुनी कारबाहीका लागि इलाका प्रहरी कार्यालय ढोडरी, बर्दियामा बुझाइएको छ।
यसैबीच, मधुबन नगरपालिका–६ मा अवैध रूपमा भन्सार छली गरी ल्याइएका सामान गोदाम गरी राखिएको सूचनाका आधारमा प्रहरीले दुई स्थानमा छापा मारेको थियो। कारबाहीका क्रममा कोपिला खत्रीको घरमा रहेको गोदामबाट मटर, कालो प्लास्टिक र सुर्तीजस्ता सामान बरामद गरिएको छ। उक्त सामानको अनुमानित मूल्य ५ लाख ४१ हजार ७२० रुपैयाँ रहेको प्रहरीले जनाएको छ।
त्यसैगरी पदमराज चौधरीको घरमा रहेको गोदामबाट कमला पसन्द, बिडी, विभिन्न ब्रान्डका सुर्ती, चुरोट, सुपारी तथा प्लास्टिकजन्य सामग्री बरामद गरिएको छ। ती सामानको अनुमानित मूल्य १२ लाख ६१ हजार १२० रुपैयाँ रहेको छ।
दुवै गोदामबाट बरामद गरिएका सामानको कुल मूल्य १८ लाख २ हजार ८४० रुपैयाँ रहेको प्रहरीले जनाएको छ।
एकै दिनमा गरिएको दुई छुट्टाछुट्टै कारबाहीबाट कुल ४३ लाख ६१ हजार ८४० रुपैयाँ बराबरका अवैध सामान तथा सवारी साधन बरामद हुनु लुम्बिनी प्रदेश प्रहरीको पछिल्लो समयको उल्लेखनीय सफलतामध्ये एक मानिएको छ।
सीमावर्ती क्षेत्रमा हुने अवैध आयात तथा तस्करी नियन्त्रणका लागि लुम्बिनी प्रदेश प्रहरी कार्यालयको ब्यूरो टोलीले निगरानी थप प्रभावकारी बनाएको छ। प्रहरीको निरन्तर सक्रियताका कारण तस्करीमा संलग्न समूहहरू माथि दबाब बढ्दै गएको छ भने अवैध कारोबार नियन्त्रणमा समेत सकारात्मक प्रभाव परेको देखिएको छ। “सीमावर्ती क्षेत्रमा हुने अवैध तस्करीविरुद्ध शून्य सहनशीलताको नीति अपनाउँदै लुम्बिनी प्रदेश प्रहरी कार्यालयले कारबाहीलाई निरन्तरता दिएको छ,” प्रहरी स्रोतले जनाएको छ।
Discussion about this post