बाँके जेठ २४ गते ।
राष्ट्रिय स्वतन्त्र पार्टी (रास्वपा) बाँकेको सभापतिमा विवेककुमार श्रेष्ठ निर्वाचित भएका छन् । रास्वपा बाँकेको आइतवार सम्पन्न ऐतिहासिक प्रथम जिल्ला अधिवेशनबाट श्रेष्ठ निर्वाचित भएका हुन् ।
चार जना विच भएको प्रतिष्पर्धामा श्रेष्ठले ८५ मत पाएर विजयी हुँदा आनन्दबाबु काफ्लेले ५२, हरिपाल सिंह केसीले ३९ र विनोद अग्रहरीले ११ मत पाएको निर्वाचन मण्डलले जनाएको छ ।
उपसभापतिमा इश्वरी लामिछाने ११९ मत पाएर विजयी भइन् । उनका निकतम प्रतिद्वन्द्वी रामबहादुर विष्टले ६८ मत पाए ।
त्यसैगरी, सचिवमा शुभमकुमार गुप्ता एक सय मत ल्याएर विजयी भए । उनका निकतम प्रतिद्वन्द्वी बुद्धिसागर सुवेदीले ८९ मत पाए । उप–सचिवमा फाहरुक गुजर निर्विरोध निर्वाचित भएको निर्वाचन मण्डलले जानकारी दिएको छ ।
निर्वाचन मण्डलले दिएको जानकारी अनुसार जातिय सदस्य अन्तरगत मुस्लिमतर्फ भएको निर्वाचनमा कमर जहाँ एक सय २१ मतका साथ विजयी हुँदा उनका प्रतिद्वन्द्वी सहजाद अलि जोलाहाले ५७ मत पाए ।
दलिततर्फ स्मृति नेपालीले १४५ र मनोज नेपालीले ३७ मत पाए भने खुला सदस्यतर्फ एकलाल थापा क्षेत्री, हेमराज बराल र यमुनाकुमारी थापा मगर विजयी भएका छन् । कुल २४६ मतदाता संख्या रहेको रास्वपा बाँकेमा १९१ मत खसेको थियो भने २ मत बदर भएको थियो ।
नवनिर्वाचित सभापति श्रेष्ठले पार्टीलाई अझ धेरै उचाईमा पुर्याउन आफूले सक्दो प्रयास गर्ने बताए । उनले जनताको हितलाई सर्वोपरी राखेर काम गर्ने बताउँदै पार्टीको साखलाई जोगाई राख्ने प्रतिवद्धता जनाएका छन् । ‘पार्टीप्रति जनताले देखाएको मायालाई बरकरार राख्न मेरोतर्फबाट कुनै कसर बाँकी राख्ने छैन,’ उनले भने, ‘पार्टीका मतदाताले दिएको विश्वासलाई टुट्न दिने छैन ।’
उनले पार्टीको आन्तरिक निर्वाचन लोकतन्त्रको सुन्दर गहना भएको बताउँदै प्रतिष्पर्धीहरुको भावनाको सदैव कदर गर्ने स्पष्ट पारे । ‘पदभन्दा जनता र पार्टीको हितमा मेरो ध्यान केन्द्रित हुने छ,’ उनले भने ।
रास्वपा नेपालगन्ज नगर सभापति नविन खड्काले रास्वपा बाँकेको नेतृत्व यूवाले पाएको बताउँदै यसले पार्टीलाई एक ढिका भएर अगाडी बढ्ने बाटो खुलेको बताए । उनले बाँकेको समग्र विकासका लागि पार्टीले महत्वपूर्ण भूमिका खेल्ने बताउँदै आगामी दिनमा अझ जुझारु भएर लाग्ने प्रतिवद्धता जनाए ।
Discussion about this post