बाँके, जेठ २३ गते ।
बाँके जिल्ला अदालतले अदालत परिसरमा हुने अनावश्यक भिडभाड नियन्त्रण, सुरक्षा व्यवस्था सुदृढीकरण तथा मर्यादित वातावरण कायम राख्ने उद्देश्यले नयाँ प्रवेश तथा आचरणसम्बन्धी नियमहरू लागू गर्ने भएको छ।
अदालत प्रशासनले जारी गरेको सूचनाअनुसार आगामी जेठ २५ गतेदेखि अदालत प्रवेश गर्ने सबै सरोकारवालाले नौ बुँदे निर्देशन अनिवार्य रूपमा पालना गर्नुपर्नेछ। अदालत परिसरमा सम्भावित असुरक्षा तथा अव्यवस्था न्यूनीकरण गर्ने उद्देश्यले प्रशासन शाखाले उक्त व्यवस्था लागू गरिएको जनाएको छ।
नयाँ व्यवस्थाअनुसार कानुन व्यवसायीहरूले ‘कानुन व्यवसायीको पेसागत आचरणसम्बन्धी नियमावली, २०७९’ बमोजिम तोकिएको पोसाक लगाएर मात्र अदालतमा प्रवेश गर्न पाउनेछन्। त्यसैगरी लेखापढी व्यवसायीहरूले पनि संशोधित नियमावलीअनुसार निर्धारित पोसाक तथा परिचयपत्र अनिवार्य रूपमा साथमा राख्नुपर्नेछ।
सेवाग्राहीहरूले फिरादपत्र, प्रतिउत्तरपत्र वा अन्य निवेदन दर्ता गर्न आउँदा आफ्नो परिचयपत्र अनिवार्य रूपमा प्रस्तुत गर्नुपर्ने व्यवस्था गरिएको छ। साथै, साक्षी बकपत्रका लागि उपस्थित हुने साक्षीहरूले सम्बन्धित साक्षी निवेदनपत्र र तारिखमा रहेका पक्ष वा वारिसहरूले तारिख पर्चासहित परिचयपत्र देखाएर मात्र अदालतभित्र प्रवेश पाउनेछन्।
अदालतले अशक्त तथा ज्येष्ठ नागरिकप्रति संवेदनशीलता अपनाउँदै उनीहरूलाई एक जनासम्म सहयोगी साथमा ल्याउन अनुमति दिएको छ। अदालत परिसरको स्वच्छता र मर्यादा कायम राख्न पान, गुट्खा लगायतका पदार्थ सेवन गर्न तथा त्यस्ता वस्तु साथमा ल्याउन पूर्ण प्रतिबन्ध लगाइएको छ।
तोकिएका वर्ग र प्रयोजनबाहेकका अन्य व्यक्तिहरूलाई अदालतको पूर्वअनुमतिबिना प्रवेश गर्न नपाइने व्यवस्था गरिएको छ। साथै, मुख्य प्रवेशद्वारमा सुरक्षा गार्डद्वारा कडा जाँचपश्चात् मात्र प्रवेश अनुमति दिइने अदालतले जनाएको छ।
अदालतले लागू गर्न लागेको यो व्यवस्थाले अदालत परिसरमा हुने होहल्ला र अनावश्यक भिडभाड नियन्त्रण हुनुका साथै सुरक्षा व्यवस्थालाई थप प्रभावकारी बनाउने अपेक्षा गरिएको छ।
अधिवक्ता वसन्त गौतमले नयाँ व्यवस्थाले अदालतको कार्यसम्पादनलाई थप व्यवस्थित, सुरक्षित र मर्यादित बनाउन सहयोग पुग्ने विश्वास व्यक्त गरे।
Discussion about this post