बाँके, जेठ २५ गते ।
गत भदौ २३ र २४ गते भएको जेनजी आन्दोलनका क्रममा काठमाडौँस्थित जगन्नाथदेवल कारागारबाट फरार भएका एक कैदीलाई बाँके प्रहरीले पक्राउ गरेको छ।
जिल्ला प्रहरी कार्यालय बाँकेका अनुसार आन्दोलनका क्रममा गत भदौ २४ गते कारागारबाट भागेका बाँके खजुरा गाउँपालिका–३ निवासी अमृत सुनारलाई प्रहरीले नियन्त्रणमा लिएको हो।
जिल्ला प्रहरी कार्यालय बाँकेका सूचना अधिकारी प्रहरी नायब उपरीक्षक प्रतितसिंह राठौरका अनुसार विशेष सूचनाका आधारमा इलाका प्रहरी कार्यालय धनौली, खजुराबाट खटिएको प्रहरी टोलीले सुनारलाई खजुरा गाउँपालिका–३ स्थित आफ्नै घर नजिक हिँडिरहेको अवस्थामा पक्राउ गरेको थियो।
प्रहरीका अनुसार सुनार लागुऔषधसम्बन्धी मुद्दामा दोषी ठहर भई पाँच वर्ष कैद सजाय भुक्तान गरिरहेका थिए। उनी जगन्नाथदेवल कारागार, काठमाडौँमा कैद जीवन बिताइरहेका बेला आन्दोलनको क्रममा फरार भएका थिए।
पक्राउ परेका सुनारलाई आवश्यक कानुनी प्रक्रिया पूरा गरी सम्बन्धित निकायमा बुझाउने तयारी भइरहेको प्रहरीले जनाएको छ।
Discussion about this post