बाँके, जेठ २६ गते ।
बाँकेको नेपालगञ्जस्थित कारकाँदो ट्राभल भिलेज नजिक सुर्खेत रोड क्षेत्रमा एक युवतीमाथि साङ्घातिक आक्रमण भएको छ। आक्रमणबाट २० वर्षीया जीना भुजु गम्भीर घाइते भएकी छन्।
प्राप्त जानकारीअनुसार गएराति करिब १ बजे आफ्नै घरमा सुतिरहेकी भुजुमाथि एक व्यक्तिले धारिलो हतियारसहित आक्रमण गरेको बताइएको छ। आक्रमणका क्रममा उनको शरीरका विभिन्न भागमा गम्भीर चोट लागेको जनाइएको छ।
पीडितले आक्रमणकारीको प्रतिकार गर्ने क्रममा ठूलो आवाज आएपछि उनका अभिभावक घटनास्थलमा पुगेका थिए। परिवारका सदस्यको सहयोगमा आक्रमणकारीलाई नियन्त्रणमा लिइएको बताइएको छ।
घटनामा संलग्न व्यक्ति नेपालगञ्ज उपमहानगरपालिका–१६, जसस्पुर निवासी सुरज सुनार सोनकर रहेको खुलेको छ। घटनाबारे जानकारी प्राप्त हुनासाथ स्थानीयवासी तथा परिवारका सदस्यले प्रहरीलाई खबर गरेका थिए।
गम्भीर घाइते भएकी जीना भुजुको नेपालगञ्जस्थित सञ्जीवनी अस्पतालमा उपचार भइरहेको छ। पक्राउ परेका आरोपीलाई थप अनुसन्धानका लागि जिल्ला प्रहरी कार्यालय बाँकेको हिरासतमा राखिएको जनाइएको छ।
घटनापछि स्थानीयवासी तथा पीडित पक्षले महिला तथा बालबालिकामाथि हुने हिंसात्मक घटनाप्रति सम्बन्धित निकाय गम्भीर बन्नुपर्ने बताएका छन्। उनीहरूले दोषीमाथि कानुनबमोजिम कडा कारबाही गर्दै यस्ता जघन्य अपराधको रोकथामका लागि प्रभावकारी सुरक्षा व्यवस्था गर्न माग गरेका छन्।
यस घटनाबारे प्रहरीले थप अनुसन्धान गरिरहेको जनाएको छ।
Discussion about this post