बाँके, असार ३ गते ।
तातो हावा (लू) र निरन्तर बढ्दो तापक्रमका कारण बाँकेको जनजीवन प्रभावित बनेको छ। केही दिनयता चर्को घाम र असह्य गर्मीका कारण सर्वसाधारणको दैनिक जीवन कष्टकर बन्दै गएको हो।
अत्यधिक गर्मीका कारण नेपालगन्ज लगायत जिल्लाका विभिन्न बजार क्षेत्रमा दिउँसो मानिसहरूको आवतजावत उल्लेखनीय रूपमा घटेको छ। चर्को घामका कारण स्थानीय बजारहरू मध्याह्न समयमा प्रायः सुनसान देखिन थालेका छन् भने मानिसहरू बिहान र साँझको समयमा मात्र आवश्यक कामका लागि घरबाहिर निस्कने गरेका छन्।
नेपालगन्जको बीपीचोक निवासी राजेन्द्र थापाले अत्यधिक गर्मीका कारण घरबाहिर निस्कनेबित्तिकै चक्कर लाग्ने, टाउको दुख्ने तथा शारीरिक असहजता महसुस हुने गरेको बताए। उनका अनुसार गर्मीका कारण दैनिक कामकाजसमेत प्रभावित हुन थालेको छ।
चर्को घाम र अत्यधिक तापक्रमका कारण बालबालिकाको स्वास्थ्यमा प्रतिकूल असर पर्न थालेपछि नेपालगन्ज, कोहलपुर, खजुरा, बैजनाथ र जानकी गाउँपालिकाका विद्यालयहरू एक साताका लागि बन्द गरिएका थिए। स्थानीय तहले दिएको बिदा समाप्त भई विद्यालय सञ्चालनमा आए पनि गर्मीको प्रभाव भने अझै कम हुन सकेको छैन।
यता, गर्मीका कारण विद्युत् खपत बढ्दै जाँदा आपूर्ति प्रणालीमा समेत दबाब परेको छ। लोड व्यवस्थापनमा समस्या उत्पन्न हुँदा नेपालगन्ज तथा आसपासका क्षेत्रमा विद्युत् आपूर्ति बेला–बेलामा अवरुद्ध हुने गरेको छ। यसले सर्वसाधारणको दैनिकी थप कष्टकर बनेको नागरिक सरोकार मञ्च बाँकेका संयोजक कृष्णप्रसाद श्रेष्ठले बताए।
उनका अनुसार एकातर्फ अत्यधिक गर्मी र अर्कोतर्फ विद्युत् आपूर्तिमा देखिएको समस्याले नागरिकलाई दोहोरो मार परेको छ। विद्युत् प्राधिकरण नेपालगन्ज वितरण केन्द्रले भने सकेसम्म नियमित आपूर्ति कायम राख्ने प्रयास भइरहेको जनाएको छ।
वितरण केन्द्रका प्रमुख संजयकुमार मिश्रले स्थानीय स्तरमा विद्युत् सेवा सुधारका लागि आवश्यक काम भइरहेको बताउँदै कहिलेकाहीँ प्रणाली तथा सर्किटमा समस्या आउनुका साथै माथिल्लो तहबाट नै विद्युत् आपूर्ति प्रभावित हुँदा अवरोध सिर्जना हुने गरेको जानकारी दिए।
गर्मी बढेसँगै बजारमा फलफूल, उखुको जुस तथा विभिन्न चिसा पेय पदार्थको बिक्री उल्लेखनीय रूपमा बढेको व्यवसायीहरू बताउँछन्। साथै अत्यधिक गर्मीका कारण झाडापखाला, ज्वरो, डिहाइड्रेसन लगायत विभिन्न स्वास्थ्य समस्या भएका बिरामीहरूको संख्या पनि बढ्न थालेको चिकित्सकहरूले जनाएका छन्।
स्वास्थ्यकर्मीहरूले अत्यावश्यक कामबाहेक दिउँसोको समयमा घरबाहिर ननिस्कन, प्रशस्त पानी पिउन तथा गर्मीबाट बच्ने उपाय अपनाउन सर्वसाधारणलाई आग्रह गरेका छन्।
Discussion about this post