दाङ, असार ३ गते।
सामाजिक सञ्जालमा एक युवतीलाई खुकुरी देखाई डरत्रास सिर्जना गर्दै कुटपिट गरेको भिडियो सार्वजनिक भएपछि घटनामा संलग्न एक युवक लागूऔषधसहित पक्राउ परेका छन्।
दाङको तुलसीपुर उपमहानगरपालिका–२ भङ्के निवासी २४ वर्षीय रमेश ठाडा मगरलाई इलाका प्रहरी कार्यालय तुलसीपुरबाट खटिएको प्रहरी टोलीले असार २ गते उनकै निवासबाट पक्राउ गरेको हो। मगरले एक युवतीलाई जङ्गल क्षेत्रमा लगेर खुकुरी देखाउँदै धम्क्याएको तथा कुटपिट गरेको भिडियो सामाजिक सञ्जालमा सार्वजनिक भएको थियो।
प्रहरीले मगरको घरमा खानतलासी गर्दा ‘प्रेगाम्याक्स’ एक ट्याब्लेट, ‘ट्रोहमो’ ४१ ट्याब्लेट, ‘एन्टिकोप’ दुई ट्याब्लेट र ‘नाइट्राजोम’ पाँच ट्याब्लेट बरामद गरेको जनाएको छ।
उक्त घटनामा संलग्न रहेको आरोपमा २१ वर्षीय जीवराज खत्रीलाई पनि प्रहरीले नियन्त्रणमा लिएको छ। पक्राउ परेका दुवै जनामाथि आवश्यक कानुनी प्रक्रिया अघि बढाइएको तथा घटनाबारे थप अनुसन्धान भइरहेको इलाका प्रहरी कार्यालय तुलसीपुरले जनाएको छ।
प्रहरीका अनुसार घटनामा पीडित युवतीको स्वास्थ्य अवस्था सामान्य रहेको छ।
Discussion about this post