बाँके, साउन ३ गते ।
भारत–नेपाल सीमास्थित रुपईडीहामा ५३ ग्राम ब्राउन सुगरसहित एक भारतीय नागरिक पक्राउ परेका छन्।
शनिबार राति रुपईडीहा प्रहरी र सशस्त्र सीमा बल (एसएसबी)को संयुक्त गस्ती टोलीले भारतबाट नेपालतर्फ आउँदै गरेका ३८ वर्षीय शमीम अहमदलाई नियन्त्रणमा लिएको हो। खानतलासीका क्रममा उनको साथबाट ५३ ग्राम ब्राउन सुगर, २०० भारतीय रुपैयाँ र १०० नेपाली रुपैयाँ बरामद भएको रुपईडीहा प्रहरीका प्रभारी निरीक्षक हरेंद्र कुमार मिश्रले जानकारी दिए।
पक्राउ परेका शमीम रुपईडीहाको विवेकानन्द नगरस्थित चिकवन टोलाका बासिन्दा हुन्। भारतीय प्रहरीका अनुसार उनीविरुद्ध यसअघि पनि लागूऔषधसम्बन्धी तीन तथा हतियार ऐनअन्तर्गत एक मुद्दा दर्ता भइसकेको छ।
भारतीय प्रहरीले उनीविरुद्ध लागूऔषध नियन्त्रणसम्बन्धी कानुनअन्तर्गत मुद्दा दर्ता गरी थप अनुसन्धान तथा कानुनी प्रक्रिया अघि बढाएको जनाएको छ।
Discussion about this post