काठमाडौं, साउन ७ गते ।
देशका विभिन्न जिल्लामा फैलिएको बर्डफ्लु नियन्त्रणउन्मुख बनेको छ। पशु सेवा विभागका अनुसार साउन १ गतेयता देशमा नयाँ सङ्क्रमण पुष्टि भएको छैन। पछिल्लो पटक काठमाडौंको गोकर्णेश्वर–१, सुन्दरीजलमा संक्रमण देखिएपछि त्यस क्षेत्रसहित आसपासका स्थानमा निगरानी र परीक्षणलाई तीव्र बनाइएको छ।
पशु सेवा विभागका महानिर्देशक डा. उमेश दाहालका अनुसार हाल प्रभावित क्षेत्र वरपरबाट नमुना सङ्कलन गरी परीक्षण भइरहेको छ। हालसम्म नयाँ सङ्क्रमण नदेखिएकाले अवस्था नियन्त्रणमा रहेको उनले बताए।
‘अहिले अवस्था नियन्त्रणमै छ। प्रभावित क्षेत्र आसपासबाट नमुना सङ्कलन गरेर नियमित परीक्षण गरिरहेका छौं,’ उनले भने।
विभागका अनुसार बर्डफ्लु पहिलो पटक चैत ४ गते केन्द्रीय पशु तथा पन्छी रोग अन्वेषण प्रयोगशालामा गरिएको पीसीआर परीक्षणबाट पुष्टि भएको थियो। त्यसपछि चैत ६ गते कृषि तथा पशुपन्छी विकास मन्त्रालयले प्रभावित क्षेत्र घोषणा गरेको थियो। पहिलो संक्रमण मोरङको उर्लाबारी–८ र सुन्दरहरैँचा–४ मा देखिएको थियो।
संक्रमण सबैभन्दा बढी व्यावसायिक रूपमा अण्डा उत्पादन गर्ने लेयर्स कुखुरामा देखिएको विभागले जनाएको छ। त्यसबाहेक प्यारेन्ट स्टक, ब्रोइलर, स्थानीय कुखुरा, हाँस, टर्की र कालिजमा पनि रोग फैलिएको थियो। हालसम्म ११ जिल्लामा संक्रमण पुष्टि भएको छ।
काठमाडौं उपत्यकाबाहेकका सात जिल्लामा संक्रमण पूर्ण रूपमा नियन्त्रणमा आइसकेको विभागको दाबी छ। काठमाडौं उपत्यका र काभ्रेपलाञ्चोकमा मात्रै ११९ स्थानमा संक्रमण पुष्टि भएको थियो। काठमाडौंमा ३२, ललितपुर (सदर चिडियाखानासहित) मा १५ र भक्तपुरमा ४५ स्थानमा संक्रमण देखिएको थियो। काभ्रेपलाञ्चोकमा २७ स्थान प्रभावित भएका थिए।
आठ लाखभन्दा बढी पन्छी नष्ट
संक्रमण नियन्त्रणका क्रममा देशभर आठ लाख ३५ हजार ५६३ वटा पन्छी नष्ट गरिएको विभागले जनाएको छ। त्यस्तै ११ लाख ६५ हजार ६६३ वटा अण्डा र दुई लाख ४५ हजार ३५ किलो दाना पनि नष्ट गरिएको छ।
वरिष्ठ पशु चिकित्सक डा. मुकुल उपाध्यायका अनुसार काठमाडौं उपत्यका र काभ्रेमा मात्रै तीन लाख ६७ हजार ८३५ वटा पन्छी नष्ट गरिएको थियो।
किसानलाई ५० करोडभन्दा बढी राहत
बर्डफ्लुबाट प्रभावित किसानलाई राहत वितरणको काम पनि अन्तिम चरणमा पुगेको विभागले जनाएको छ। सरकारले रकमान्तरमार्फत ५२ करोड रुपैयाँ व्यवस्थापन गरेकोमा हालसम्म १०४ जना किसान तथा पन्छी फार्मलाई ५० करोड ७१ लाख १५ हजार ७०४ रुपैयाँ राहत निकासा गरिसकेको महानिर्देशक दाहालले जानकारी दिए।
अण्डा र मासुको बजारमा सुधार
संक्रमण घट्दै गएसँगै बजारमा कुखुराको मासु र अण्डाको माग पनि बढ्न थालेको छ। संक्रमणका कारण केही महिनाअघि मूल्य घट्दा किसानले ठूलो आर्थिक क्षति बेहोरेका थिए। चल्ला बिक्री नहुँदा नष्ट गर्नुपर्ने अवस्था समेत आएको थियो।
विभागका अनुसार अहिले देशभरका पन्छी रोग अन्वेषण प्रयोगशालाबाट नियमित परीक्षण भइरहेको छ। सरकारी निकायको सक्रियता, किसानको सहयोग र निगरानीका कारण थप संक्रमण फैलिने जोखिम न्यून बन्दै गएको विभागको निष्कर्ष छ।
Discussion about this post