बाँके, साउन १५ गते ।
सुनसरी र सिराहामा भएका घटनापछि त्यसको प्रभाव अन्य क्षेत्रमा पर्न नदिन तथा सामाजिक सद्भाव र धार्मिक सहिष्णुता कायम राख्न नेपालगन्जमा शनिबार सद्भाव र्याली निकालिने भएको छ । नेपालगन्जमा विभिन्न समुदायबीचको सामाजिक सम्बन्धलाई थप सुदृढ बनाउने उद्देश्यले स्थानीय तहदेखि प्रशासनसम्मले सक्रियता बढाएका बेला र्याली आयोजना गर्न लागिएको हो ।
जिल्ला प्रशासन कार्यालय बाँकेमा बिहीबार बसेको सर्वदलीय तथा सर्वपक्षीय बैठकले शनिबार बिहान ७ः३० बजे बीपी चोकबाट र्याली निकाल्ने निर्णय गरेको हो । ¥याली धम्बोझीस्थित वीरेन्द्र चोकसम्म पुग्नेछ । र्यालीमा राजनीतिक दल, जनप्रतिनिधि, धार्मिक अगुवा, नागरिक समाज, संघसंस्था तथा आम नागरिकलाई सहभागी हुन आह्वान गरिएको छ ।
प्रमुख जिल्ला अधिकारी दिलकुमार तामाङको अध्यक्षतामा बसेको बैठकले पछिल्ला घटनाबाट उत्पन्न संवेदनशील अवस्थालाई ध्यानमा राख्दै जिल्लामा सामाजिक तथा धार्मिक सद्भाव कायम राख्न सबै पक्षलाई संयमित र जिम्मेवार भूमिका निर्वाह गर्न आग्रह गरेको छ ।
बैठकले सुनसरीको देवानगञ्ज–३, कप्तानगञ्जमा साउन १० गते भएको घटनामा मृत्यु भएका ओमप्रकाश मेहता र जयप्रकाश मेहता तथा सिराहामा साउन १४ गते भएको घटनामा मृत्यु भएका गणेश यादवप्रति श्रद्धाञ्जली व्यक्त गरेको छ । मृतकका परिवारजनप्रति समवेदना व्यक्त गर्दै घटनामा घाइते भएकाहरूको शीघ्र स्वास्थ्यलाभको कामना पनि गरिएको छ ।
घटनाको निष्पक्ष छानबिन गरी दोषीमाथि कानुनबमोजिम कारबाही गर्न नेपाल सरकारसँग माग गर्ने निर्णयसमेत बैठकले गरेको छ । घटनाको सत्यतथ्य सार्वजनिक हुनु र दोषीमाथि कानुनी कारबाही हुनु नै सामाजिक तनाव कम गर्ने महत्वपूर्ण आधार हुनेमा बैठकमा सहभागीहरूले जोड दिएका थिए ।
नेपालगन्ज बहुधार्मिक तथा बहुसांस्कृतिक समुदायको बसोबास रहेको सहर भएकाले पछिल्ला घटनाको प्रभाव यहाँ पर्न नदिन प्रशासन, राजनीतिक दल, धार्मिक अगुवा र नागरिक समाजबीच समन्वय आवश्यक रहेको बैठकमा सहभागीहरूको भनाइ थियो । विगतमा पनि विभिन्न समुदायबीच देखिएका असमझदारी संवाद र स्थानीय तहको पहलबाट समाधान हुँदै आएका कारण अहिले पनि संयमित व्यवहार र आपसी संवादलाई प्राथमिकता दिनुपर्नेमा जोड दिइएको छ ।
बैठकले सार्वजनिक स्थानमा डीजे तथा साउन्ड सिस्टम बजाउन लगाइएको प्रतिबन्धलाई कडाइका साथ कार्यान्वयन गर्ने निर्णयसमेत दोहो¥याएको छ । धार्मिक तथा सामाजिक कार्यक्रमका क्रममा हतियार प्रदर्शन नगर्न आग्रह गर्दै परम्परागत रूपमा प्रयोग हुने हतियारलाई सांस्कृतिक प्रतीकका रूपमा मात्र प्रयोग गर्न अनुरोध गरिएको छ ।
प्रशासनले सामाजिक सञ्जालमा आउने अपुष्ट सूचना, उत्तेजक सामग्री तथा अफवाहका कारण सामाजिक वातावरण प्रभावित हुन सक्ने भन्दै सबै पक्षलाई सचेत रहन आग्रह गरेको छ । कुनै पनि घटनालाई लिएर उत्तेजित हुने वा समुदायबीच अविश्वास बढाउने गतिविधि नगर्नसमेत बैठकले आग्रह गरेको छ ।
सद्भाव र्यालीलाई केवल औपचारिक कार्यक्रमका रूपमा नभई नेपालगन्जको सामाजिक एकता र धार्मिक सहिष्णुताको सन्देश दिने अवसरका रूपमा अघि बढाउने तयारी गरिएको छ । त्यसका लागि विभिन्न राजनीतिक दल, धार्मिक समुदाय, सामाजिक संघसंस्था र नागरिकलाई सहभागी गराउने प्रयास भइरहेको प्रशासनले जनाएको छ ।
बैठकमा जनप्रतिनिधि, राजनीतिक दलका प्रमुख तथा प्रतिनिधि, धार्मिक गुरु, विभिन्न संघसंस्थाका प्रमुख तथा प्रतिनिधिलगायत सरोकारवालाको सहभागिता थियो ।
Discussion about this post