बाँके, साउन १६ गते ।
सुनसरी र सिराहामा भएका पछिल्ला घटनापछि सामाजिक तथा धार्मिक सद्भाव कायम राख्न शनिबार नेपालगञ्जमा सद्भाव र्याली निकालिएको छ। पूर्वी तराईका केही जिल्लामा उत्पन्न तनावको प्रभाव सामाजिक सद्भावमा पर्न नदिन र्याली आयोजना गरिएको हो।
जिल्ला प्रशासन कार्यालय बाँकेको संयोजनमा निकालिएको र्यालीमा राजनीतिक दलका प्रतिनिधि, प्रदेश तथा प्रतिनिधिसभा सदस्य, पूर्वसंविधानसभा सदस्य, स्थानीय तहका जनप्रतिनिधि, सुरक्षा निकाय, नागरिक समाज, उद्योगी–व्यवसायी, धार्मिक अगुवा, मानव अधिकारकर्मी, सञ्चारकर्मी तथा विभिन्न संघसंस्थाका प्रतिनिधिको सहभागिता थियो।
वीपी चोकबाट सुरु भएको र्याली धम्बोझीको वीरेन्द्र चोक पुगेको थियो। वीरेन्द्र चोकमा र्यालीपछि दीप प्रज्ज्वलन तथा मौनधारण गरिएको थियो। सहभागीहरूले सामाजिक सद्भाव, धार्मिक सहिष्णुता र आपसी विश्वास कायम राख्न सबै पक्ष जिम्मेवार र संयमित हुनुपर्नेमा जोड दिएका थिए।कार्यक्रममा बाँकेका प्रमुख जिल्ला अधिकारी दिलकुमार तामाङले जिल्लामा शान्ति र सुव्यवस्था कायम राख्ने दायित्व सबै पक्षको भएको बताए। उनले सामाजिक सद्भाव कायम भए मात्र जिल्लाको विकास र समृद्धिको परिकल्पना गर्न सकिने बताए। ‘जिल्लामा सद्भाव कायम भए मात्र समृद्धिको परिकल्पना गर्न सकिन्छ,’ उनले भने।
प्रमुख जिल्ला अधिकारी तामाङले कुनै पनि घटना वा अफवाहका आधारमा सामाजिक सद्भाव खलबलिने गतिविधिमा संलग्न नहुन आग्रह गरे। उनले सामाजिक सञ्जाल तथा अन्य माध्यमबाट फैलिन सक्ने अपुष्ट सूचनाको पछि नलागी सत्यतथ्य सूचना मात्र विश्वास गर्न आग्रह गरे।
शान्ति, सुरक्षा र सामाजिक सद्भाव कायम राख्न प्रशासन, सुरक्षा निकाय, राजनीतिक दल, नागरिक समाज र समुदायबीच सहकार्य आवश्यक रहेको उनको भनाइ थियो। बाँकेमा कायम रहेको आपसी सद्भाव र सहिष्णुताको वातावरणलाई थप सुदृढ बनाउन सबै पक्षको सकारात्मक भूमिका आवश्यक रहेको उनले बताए।
नागरिक समाज बाँकेका संयोजक कृष्णप्रसाद श्रेष्ठले पूर्वी तराईमा भएका घटना दुःखद भएको बताए। त्यस्ता घटनाबाट बाँकेबासीले पाठ सिक्दै सामाजिक एकता र सद्भावलाई अझ बलियो बनाउनुपर्ने उनको भनाइ थियो। ‘सद्भावको सहरका रूपमा नेपालगञ्ज चिनिन्छ। यसलाई बरकरार राख्ने हामी सबैको दायित्व हो,’ उनले भने।
शुक्रबार जिल्ला प्रशासन कार्यालयमा बसेको सर्वपक्षीय बैठकले जिल्लामा शान्ति, सामाजिक सद्भाव र आपसी विश्वास कायम राख्न सद्भाव र्याली आयोजना गर्ने निर्णय गरेको थियो। सोही निर्णयअनुसार शनिबार बिहान र्याली निकालिएको हो।
नेपालगञ्ज लामो समयदेखि धार्मिक तथा सामाजिक विविधताबीचको सहअस्तित्वका लागि परिचित सहरका रूपमा चिनिँदै आएको छ। पछिल्ला घटनाको प्रभाव जिल्लामा पर्न नदिन प्रशासनले राजनीतिक दल, नागरिक समाज, धार्मिक अगुवा तथा सर्वसाधारणलाई संयमित र जिम्मेवार भूमिका निर्वाह गर्न आग्रह गरेको छ।
Discussion about this post