कपिलवस्तु, साउन २१ गते ।
कपिलवस्तुको बुद्धभूमि नगरपालिका–१ वीरपुरबाट प्रहरीले अवैध रूपमा नदीजन्य पदार्थ ढुवानी गरिरहेका तीन टिप्पर नियन्त्रणमा लिएको छ।
इलाका प्रहरी कार्यालय गोरुसिङ्गेका प्रहरी निरीक्षक बाबुराम बस्नेतको नेतृत्वमा खटिएको टोलीले बुधबार लु १ क ४८७७, लु १ क ५५८४ र लु १ क ४६०१ नम्बरका टिप्पर नियन्त्रणमा लिएको हो। ती टिप्परमा मिस्कट (ढुंगा, गिट्टी र बालुवाको मिश्रण) ढुवानी भइरहेको अवस्थामा फेला परेको जिल्ला प्रहरी कार्यालय कपिलवस्तुका सूचना अधिकारी प्रहरी नायब उपरीक्षक रिपेन्द्रकुमार सिंहले बताए।
प्रहरीले आवश्यक कारबाहीका लागि टिप्परलाई बुद्धभूमि नगरपालिका कार्यालयमा बुझाएको थियो। नगरपालिकाले तीनै टिप्परलाई प्रतिटिप्पर ४० हजार रुपैयाँका दरले कुल १ लाख २० हजार रुपैयाँ जरिवाना गरेको छ।
ADVERTISEMENT
Discussion about this post