सिरहा, साउन २१ गते ।
सिरहा र सुनसरीमा भएका हिंसात्मक घटनामा ज्यान गुमाएका चार जनाको सम्झनामा हिन्दु–मुस्लिम समुदायले संयुक्त श्रद्धाञ्जली सभा आयोजना गरेका छन्।
साम्प्रदायिक तनाव कम गर्दै सामाजिक सद्भाव र आपसी विश्वास कायम गर्ने उद्देश्यले उद्योग व्यापार संघ गोलबजारले बिहीबार संयुक्त श्रद्धाञ्जली कार्यक्रम आयोजना गरेको हो।
कार्यक्रममा सुनसरीका तीन र सिरहाका एक मृतकप्रति श्रद्धाञ्जली अर्पण गरिएको थियो। सहभागी दुवै समुदायका प्रतिनिधिले शान्ति, सहिष्णुता, आपसी विश्वास र सामाजिक एकता कायम राख्न प्रतिबद्धता व्यक्त गरे।
आयोजकका अनुसार घटनापछि दुई समुदायबीच देखिएको अविश्वास र तनाव अन्त्य गर्दै शान्तिपूर्ण सहअस्तित्वको सन्देश दिन कार्यक्रम गरिएको हो।
साउन १० गते सुनसरीको देवानगञ्जमा भएको घटनामा ओमप्रकाश मेहता, जयप्रकाश मेहता र रवीन्द्र मेहताको मृत्यु भएको थियो। त्यसपछि सिरहाको गोलबजारमा भएको प्रदर्शनका क्रममा साउन १४ गते किशोर गणेश यादवको मृत्यु भएको थियो।
कार्यक्रमका सहभागीले हिंसा र उत्तेजनाभन्दा संवाद, सहिष्णुता र आपसी सद्भावमार्फत सामाजिक सम्बन्ध बलियो बनाउनुपर्नेमा जोड दिएका थिए।
Discussion about this post