बाँके, साउन २२ गते ।
बाँकेको डुडुवा गाउँपालिकास्थित खडैचा प्रहरी चौकीले भवन रहेको जग्गाको जग्गाधनी पुर्जा ३० वर्षपछि प्राप्त गरेको छ। तीन दशकअघि भवन निर्माण भए पनि स्वामित्व हस्तान्तरण हुन नसकेको दुई कठ्ठा सात धुर जग्गा अहिले प्रहरी चौकीको नाममा कायम भएको हो।
खडैचा प्रहरी चौकीका इन्चार्ज असई कुलबहादुर विकका अनुसार स्थानीय समाजसेवी लच्छु अहिरले करिब ३० वर्षअघि प्रहरी चौकी निर्माणका लागि उक्त जग्गा उपलब्ध गराएका थिए। तर, विभिन्न कारणले जग्गाको स्वामित्व प्रहरी चौकीको नाममा हस्तान्तरण हुन सकेको थिएन।
प्रहरी चौकीको भवन रहेको जमिन आफ्नै नाममा नहुँदा भवन विस्तार तथा अन्य भौतिक संरचना निर्माणमा समस्या हुँदै आएको थियो। जग्गाधनी पुर्जा प्राप्त भएपछि अब चौकीको भौतिक पूर्वाधार विकासका लागि सहज हुने असई विकले बताए।
‘कार्यभार सम्हालेपछि जग्गाको स्वामित्व प्रहरी चौकीको नाममा ल्याउन पहल थालेको थिएँ,’ विकले भने, ‘लामो प्रयासपछि जग्गाधनी पुर्जा प्राप्त भएको छ। अब आवश्यक भौतिक संरचना निर्माण गर्न सहज हुनेछ।’
उनका अनुसार जग्गाको स्वामित्व कायम भएसँगै प्रहरी चौकीको सेवा प्रवाहसमेत थप व्यवस्थित र प्रभावकारी बनाउन सहयोग पुग्नेछ।
Discussion about this post