काठमाडौं साउन २१ गते ।
पत्रकारको परिचयपत्र बोकेर लागुऔषध खैरो हेरोइन कारोबारमा संलग्न रहेको आरोपमा तीन जना पक्राउ परेका छन् ।
लागुऔषध नियन्त्रण ब्युरोको शाखा कार्यालय बर्दिबासबाट खटिएको टोलीले बुधबार सिन्धुलीको दुधौली नगरपालिका–९ बाट बा १६ च ७८४६ नम्बरको कारसहित उनीहरूलाई पक्राउ गरेको हो ।
पक्राउ पर्नेमा सिरहाको लक्ष्मीपुर गाउँपालिका घर भएका २६ वर्षीय उमेशकुमार यादव, लहान नगरपालिका–१० का ३० वर्षीय रमेशकुमार राम र लक्ष्मीपुर गाउँपालिका–२ का २५ वर्षीय गुल्सनप्रसाद साह रहेका छन् ।
प्रहरीका अनुसार उनीहरू सिरहाको मिर्चैयाबाट कारमा खैरो हेरोइन लिएर काठमाडौं आउँदै थिए । कार चालक यादवको साथबाट लहान–२२, सिरहा ठेगाना उल्लेख भएको ‘जनजागरण खबर’को परिचयपत्रसमेत बरामद भएको लागुऔषध नियन्त्रण ब्युरोका एसएसपी सुवास बोहराले बताए ।
बोहराका अनुसार पक्राउ परेको कार हुलास फाइनान्सबाट किस्ताबन्दीमा निकालिएको खुलेको छ ।
प्रहरीले कारको गियरबक्समा लुकाएर ल्याइएको अवस्थामा ४४ ग्राम ३४० मिलिग्राम खैरो हेरोइन बरामद गरेको जनाएको छ ।
पक्राउ परेका तीनै जनामाथि इलाका प्रहरी कार्यालय डकाहा, सिन्धुलीले थप अनुसन्धान गरिरहेको प्रहरीले जनाएको छ ।
Discussion about this post