बाँके, साउन २२ गते ।
नेपालगन्जमा म्याद गुज्रेका तथा अखाद्य खाद्य सामग्री बिक्रीका लागि राखेको भेटिएपछि तीन वटा व्यवसायिक फर्मलाई जनही ५० हजार रुपैयाँ जरिवाना गरिएको छ।
जिल्ला प्रशासन कार्यालय बाँकेको नेतृत्वमा बुधवार र बिहीबार गरिएको संयुक्त बजार अनुगमनका क्रममा नेपालगन्ज–१२ स्थित वेष्टर्न मार्ट प्रालि, नेपालगन्ज–१ धम्बोझीस्थित बर्दिया सप्लायर्स र बौद्धगुम्बा नजिकैको मिस्टर बेकर बेकरी उद्योगमा म्याद गुज्रेका तथा अखाद्य सामग्री भेटिएका थिए।
संयुक्त बजार अनुगमन समितिका संयोजक तथा सहायक प्रमुख जिल्ला अधिकारी महेश कुमार गुरुङका अनुसार तीनवटै फर्मलाई उपभोक्ता संरक्षण ऐनबमोजिम जनही ५० हजार रुपैयाँ जरिवाना गरिएको हो।
अनुगमनका क्रममा व्यवसायीको रोहबरमा म्याद गुज्रेका तथा अखाद्य सामग्री नष्टसमेत गरिएको समितिले जनाएको छ। बर्दिया सप्लायर्सबाट ३३ हजार २३७ रुपैयाँ बराबरका, वेष्टर्न मार्टबाट २३ हजार ३१३ रुपैयाँ बराबरका र मिस्टर बेकर बेकरी उद्योगबाट ११ हजार रुपैयाँभन्दा बढी मूल्यका सामग्री नष्ट गरिएको गुरुङले जानकारी दिए।
अनुगमनका क्रममा खाद्य सामग्रीमा सबैभन्दा बढी कैफियत भेटिएको गुरुङले बताए। उनका अनुसार कृत्रिम रङ मिसाइएको मासको दाल, सडेगलेका खाद्य पदार्थ तथा अत्यधिक फोहोर अवस्थामा राखिएका सामग्री फेला परेका थिए।
कतिपय व्यवसायमा मूल्यसूची नराखिएको र राखिएको मूल्यसूचीसमेत अद्यावधिक नभएको पाइएको समितिले जनाएको छ। कर बीजक नराखी कारोबार गर्ने तथा व्यवसाय दर्ता नगरी सञ्चालन गर्ने व्यवसायीलाई कारबाहीसँगै चेतावनी दिइएको छ।
‘उपभोक्ताको स्वास्थ्यमा प्रत्यक्ष असर पार्न सक्ने सामग्री बिक्रीका लागि राखिएको पाइएपछि कानुनअनुसार कारबाही गरिएको हो,’ उनले भने।
समितिले बजारमा वस्तुको गुणस्तर, मूल्य, म्यादलगायत विषयमा नियमित अनुगमन गरिरहेको जनाएको छ। व्यवसायीलाई प्रचलित कानुनअनुसार कारोबार गर्न र उपभोक्तालाई बिक्री गरिने सामग्रीको गुणस्तर तथा म्यादमा विशेष ध्यान दिन निर्देशन दिइएको छ।
संयुक्त बजार अनुगमनमा जिल्ला प्रशासन कार्यालय, आन्तरिक राजस्व कार्यालय, खाद्य प्रविधि तथा गुण नियन्त्रण कार्यालय, वाणिज्य, आपूर्ति तथा उपभोक्ता संरक्षण कार्यालय, घरेलु तथा साना उद्योग कार्यालय, नेपालगन्ज उपमहानगरपालिका तथा उपभोक्ता हित संरक्षण मञ्चका प्रतिनिधिको सहभागिता थियो।
Discussion about this post