काठमाडौें, भदौ २५ गते ।
नेकपा एमालेकी सांसद साजिदा खातुन सिद्धिकीले जेनजी आन्दोलनका सहिदको बलिदानलाई राजनीतिक स्वार्थका लागि प्रयोग नगर्न सरकारलाई आग्रह गरेकी छन्।
बिहीबार बसेको प्रतिनिधिसभा बैठकमा बोल्दै उनले आन्दोलनका क्रममा ज्यान गुमाएका युवाका परिवार, घाइते तथा सम्पत्ति गुमाएका नागरिकका विषयमा सरकार गम्भीर हुनुपर्ने बताइन्।
आन्दोलन भएको एक वर्ष बितिसक्दा पनि सहिद परिवार पीडामा रहेको भन्दै उनले उनीहरूले न्याय कहिले पाउने हुन् भन्दै सरकारसँग प्रश्न गरिन्। आन्दोलनका क्रममा युवाहरूले उठाएका माग सम्बोधन गर्न पनि सरकार चुकेको उनको आरोप थियो।
‘सहिदको रगतमा राजनीति गर्न पाइँदैन,’ उनले भनिन्, ‘जसको भूमिका प्रमाणित हुन्छ, उसले पदबाट राजीनामा मात्र होइन, पहिला जवाफदेहिता रोज्नुपर्छ।’
सहिद परिवारको अवस्था अझै पीडादायी रहेको बताउँदै उनले आन्दोलनका क्रममा उठेका सवाललाई सरकारले गम्भीरतापूर्वक लिनुपर्ने बताइन्।
‘हामीले आन्दोलनको माग सुन्यौँ, युवाहरूको आक्रोश सुन्यौँ, तर एक वर्षपछि पनि सहिद परिवारको आँखामा आँसु छ। मनभरि पीडा छ,’ उनले भनिन्, ‘सहिद परिवारले न्याय कहिले पाउने सरकार?’
आन्दोलनका क्रममा ध्वस्त भएका निजी तथा सार्वजनिक सम्पत्तिको क्षतिपूर्तिको विषयमा पनि सरकारले स्पष्ट धारणा ल्याउनुपर्ने उनको भनाइ थियो।
‘सरकार, खरानी बनेको देशलाई कहिले सुन्दर बनाउने?’ उनले प्रश्न गरिन्, ‘व्यक्तिको सम्पत्ति ध्वस्त छ, त्यसको हर्जाना राज्यले दिने हो कि विभिन्न दोषी समूहले दिने हो? पीडितले माग गर्न थालेका छन्।’
सहिदको बलिदानलाई राजनीतिक स्वार्थभन्दा राज्यको जवाफदेहितासँग जोडेर हेर्नुपर्ने उनले बताइन्।
‘सहिदको बलिदान राजनीतिक स्वार्थको विषय होइन, यो राज्यको जवाफदेहिताको विषय हो,’ उनले भनिन्, ‘हाम्रा बालबालिका तथा युवाहरूलाई अभिमन्युको चक्रव्यूहमा पठाएर बाहिरबाट तमासा हेर्ने राजनीति अब बन्द गर्नुपर्छ।’
उनले आन्दोलनमा ज्यान गुमाएका तथा प्रभावित परिवारको माग सम्बोधन गर्न सरकारसँग आग्रह गरिन्। युवाहरूले उठाएका सवालको दीर्घकालीन समाधान खोज्दै आन्दोलनबाट भएको जनधनको क्षतिको सम्बोधन गर्न पनि सरकार गम्भीर बन्नुपर्ने उनको भनाइ थियो।
Discussion about this post