रुपन्देही, असोज १५ गते ।
रुपन्देहीको सिद्धार्थनगर नगरपालिका–१ शान्तिगेटस्थित सीमा जाँचकक्षबाट सशस्त्र प्रहरीले दुई करोड ५१ लाख ९३ हजार ३५० रुपैयाँ मूल्य बराबरका सुनका गरगहना बरामद गरेको छ ।
सशस्त्र प्रहरी बल, नेपाल सीमा सुरक्षा गुल्म डण्डाबाट खटिएको टोलीले विशेष सूचनाका आधारमा भारतबाट नेपालतर्फ आउँदै गरेकी काठमाडौँ महानगरपालिका–१९ बस्ने ४६ वर्षीया इला पटेलको साथबाट गरगहना बरामद गरेको हो ।
सशस्त्र प्रहरी नायब उपरीक्षक गोपीकृष्ण भट्टराईको कमान्डमा खटिएको नेपाल प्रहरी र सशस्त्र प्रहरीको संयुक्त टोलीले शङ्कास्पद अवस्थामा रहेकी पटेललाई जाँच गर्ने क्रममा गरगहना फेला पारेको जनाएको छ ।
प्रहरीका अनुसार पटेलको साथबाट विभिन्न डिजाइन र आकारका हार, औँठी, चुरा, माला, सिक्री, झुम्का, गोली औँठी, लकेट, पोते, बाली, जुली, टप, नाकको फूली, पत्थरवाला हार र ब्रासलेटलगायतका गरगहना बरामद भएका छन् ।
बरामद गरगहनाको कुल तौल दुई किलो ६०५ ग्राम रहेको प्रहरीले जनाएको छ । गहनामा रहेको सुनको मात्रा यकिन गर्न सिद्धार्थनगर सुनचाँदी व्यवसायी सङ्घमा परीक्षणका लागि पठाइएको थियो । परीक्षणबाट गहनामा करिब एक किलो सुन रहेको पुष्टि भएको प्रहरीले जनाएको छ ।
प्रहरीका अनुसार बरामद गरगहनाको भित्री भागमा अन्य धातु प्रयोग गरिएको र बाहिरी भागमा सुनको लेपन गरिएको पाइएको छ ।
सशस्त्र प्रहरी नायब उपरीक्षक भट्टराईका अनुसार प्रचलित बजार मूल्यका आधारमा बरामद गहनामा रहेको सुनको मूल्य दुई करोड ५१ लाख ९३ हजार ३५० रुपैयाँ कायम भएको छ ।
बरामद गरगहना र नियन्त्रणमा लिइएकी पटेललाई आवश्यक अनुसन्धान तथा कारबाहीका लागि भैरहवा भन्सार कार्यालय, रुपन्देहीमा बुझाइएको प्रहरीले जनाएको छ ।
भैरहवा भन्सार कार्यालयका प्रमुख भन्सार अधिकृत हरिहर पौडेलले बरामद गरगहनाका सम्बन्धमा आवश्यक प्रक्रिया अघि बढाइएको जानकारी दिए ।
Discussion about this post