खोजखबर संवाददाता
बाँके असार २३ गते । राष्ट्रिय खेलकुद परिषदको सदस्य सचिवमा रमेश सिलवाल नियुक्त भएपछि अब प्रदेश र जिल्ला खेलकुद विकास समितिमा पनि नेतृत्व परिवर्तन हुने भएको छ ।
राखेपमा केशवकुमार विष्ट सदस्य सचिव नियुक्त भएपछि
जिम्मेवारीमा आएका क्षेत्रीय खेलकुद विकास समिति र जिल्ला खेलकुद विकास समितिका पदाधिकारी र सदस्यहरुको केही दिनमै पदावधी समाप्त हुदैछ ।
प्रदेश नम्बर ५ को प्रदेश खेलकुद विकास समितिमा बर्तमान अध्यक्ष भिम वली र रुपन्देहीका ध्रुव आचार्यको तिव्र प्रतिष्पर्धा रहेको नेकपा श्रोतले जनाएको छ ।
नेपालगञ्जमा हालै ८ औं राष्ट्रिय खेलकुद प्रतियोगिता सफलतापूर्वक सम्पन्न गरेको दावीसहित हरहिसाव फरफारक गर्न पनि बाँकी रहेको कारण देखाउँदै क्षेत्रीय अध्यक्ष वलीले पुन: अध्यक्षका लागि दावी गरिरहेको श्रोतले जनाएको छ ।
बुटवलका आचार्य मदन भण्डारी स्पोर्ट्स एकेडेमीका उपाध्यक्ष समेत हुन् । महासचिव विष्णु पौडेलको जिल्लाबासी भएको र मदन भण्डारी स्पोर्टस एकेडेमीको केन्द्रीय उपाध्यक्ष भएका कारण आचार्यको सम्भावना बलियो रहेको नेकपा श्रोतले जनाएको छ ।
यसैगरी मदन भण्डारी फाउण्डेशनका प्रदेश अध्यक्ष सुर्य ढकाललाई समितिको अध्यक्ष बनाउनुपर्ने आवाज समेत नेकपाभित्र चर्को रुपमा देखिएको छ । यसैगरी मदन भण्डारी स्पोर्टस एकेडेमीका नेता तथा युवा संघका सचिवालय सदस्य रवीन्द्र लम्साल समेत नेतृत्वको दौंडमा रहनुभएको छ । प्रदेश ५ का मुख्यमन्त्री शंकर पोख्रेल चीनबाट फर्केपछि मात्रै समितिको नेतृत्व टुंगो लाग्ने श्रोतले जनाएको छ ।
Discussion about this post