काठमाडौ पुस १८ गते । स्थानीयको अवरोध आएपनि नुवाकोटको बन्चरे डाँडाँमा ल्याण्डफिल्ड साइडको निर्माण नरोकिने सहरी विकास तथा भवन निर्माण विभागले जनाएको छ ।
शक्रबार नुवाकोटको बन्चरे डाँडाँमा निर्माण भइरहेको ल्याण्डफिल्ड साइडको अनुगमन तथा निरिक्षण गर्ने क्रममा विभागका उपमहानिर्देशक पद्म मैनालीले स्थानीयको अवरोध भएपनि निर्माण कार्य नरोकिने बताउनुभएको छ । उहाँले ल्यान्डफिल्ड साइड निर्माणमा स्थानीयको कुनै अवरोधन नहुने र आगामी फागुनको पहिलो साता सम्ममा पूर्वाधार निर्माणको सम्पूर्ण काम सकिने बताउनुभएको हो ।
छिटो काम गरी वैज्ञानिक ल्याण्डफिल्ड साइड हो भन्ने नदेखाउँदा सम्म विरोध भइरहने समेत उहाँले बताउनुभयो ।
बन्चरे डाँडाँमा काठमान्डौमा उपत्यकाको २ महानगरपालिका र १६ नगरपालिकाको फोहोर व्यवस्थापन हुने छ । त्यसका लागि नेप वेष्ट प्रालि. ले नुवाकोटको बन्चरेडाँडाँमा ल्याण्डफिल्ड निर्माणको काम गरिरहेको छ ।
नुवाकोटकै सिसडोलमा २ वर्षका लागि अस्थायी रुपमा फोहोर व्यवस्थापन गर्ने भनिएपनि १४ वर्ष सम्म फोहोर व्यवस्थापन गरिदा ल्याण्डफिल्ड साइड भरिएको छ । त्यसैले बन्चरेडाडाँमा पनि त्यही समस्या दोहोरिने आशंका स्थानीयले गरेका छन् ।
निरिक्षणका क्रममा काठमाडौं महानगरपालिकाका मेयर विद्यासुन्दर शाक्यले स्थानीयको माग जायज भएकाले सम्बोधन गरेर मात्रै फोहोर व्यवस्थापन गरिने बताउनुभयो । ललितपुर महानगरपालिकाका मेयर चिरिबाबु महर्जनले स्थानीय समस्याको समाधान नगरी काम गर्न नसकिने भएकाले कार्यतालिका बनाएर काम गर्न आफुहरु तयार रहेको बताउनुभयो ।
बन्चरेडाडाँमा ल्याण्डफिल्ड साइड निर्माणका लागि संघीय सरकारले १ अर्ब ५६ करोड रुपैयाँ बजेट विनियोजन गरेको थियो । तर स्थानीयले विकासका पूर्वाधारहरु आफुहरुसम्म नपुर्याउँदा सम्म अझैपनि फोहोर व्यवस्थापन गर्न नदिने बताएका छन् ।
त्यसैले ल्याण्डफिल्ड साइडमा पूर्वाधारको निर्माण भएपनि फोहोर व्यवस्थापनमा अवरोध हुने सम्भावना भने उत्तिकै छ ।
Discussion about this post