बाँके पुस १८ गते ।
थारु समुदायको महान पर्व माघे सक्रान्ति (नयाँ बर्ष) को अवसरमा नेपालगन्जमा माघ मिलन कार्यक्रम भव्य मनाउने भएको छ । यही पुष २७ गते नेपालगन्जमा माघ मिलन कार्यक्रम गरि माघे सक्रान्ति मनाउने भएको हो । करिव १ दर्जन थारु समुदायका हकहित र अधिकारका क्षेत्रमा काम गर्ने थारु संघ संस्थाको सयुक्त आयोजनामा माघ मिलन कार्यक्रम गरिने भएको हो । शुक्रवार थारु कल्याणकारिणी सभा बाँकेका अध्यक्ष विनोद थारुको अध्यक्षतामा बसेको बैठकले यही पुष २७ गते नेपालगन्जमा माघ मिलन कार्यक्रम गर्ने निर्णय गरेको थारु कल्याणकारिणीसभा नेपालगन्ज उपमहानगरपालिकाका नगरसभापति बासमति थारुले बताउनुभयो ।
माघ मिलन कार्यक्रममा थारु समुदायको सांस्कृतिक नाच जस्तै, झुम्रा नाच, लठ्ठहवा नाच, हुरदुङग्वा नाच, छोक्रा नाच, मयुर नाच प्रस्तुत गरिने आयोजक टिमका संयोजक विनोद थारुले बताउनुभयो । माघ मिलन कार्यक्रममा थारु परिकार जस्तै ढिक्री, घोघी, खुर्सानीको चटनी, बंगुरको मासु, जाँडको स्वाद समेत लिन सकिने उहाँले जानकारी गराउनुभयो । माघ मिलन कार्यक्रममा राष्ट्रिय तथा स्थानिय थारु कलाकारहरुको बेजोड प्रस्तुती समेत रहने उहाँले जानकारी गराउनुभयो । छलफल कार्यक्रममा थारु आदिवासी व्यवसायी संघका महासचिव पुर्ण बहादुर थारु, जंग्रार साहित्यिक बखेरीका अध्यक्ष सोम डेमनडौरा, थारु पत्रकार संघ नेपाल बाँके शाखाका अध्यक्ष भगतराम थारु, थारु महिला विकास केन्द्रका अध्यक्ष ललिता थारु, थारु कल्याणकारिणीसभा नेपालगन्ज उपमहानगरपालिकाका नगरसभापति बासमति थारु, थारु विद्यार्थी संघका सल्लाहकारद्धय जगतराम चौधरी, अविनाश चौधरी, थारु कल्याणकारिणीसभाका नेपालगन्ज उपमहानगरपालिकाका नगर सचिव शम्भु प्रसाद थारु, मुक्तकमलरी विकास मन्च बाँकेका अध्यक्ष पार्वती थारु, राष्ट्रिय थारु कलाकार मन्च बाँकेका सचिव विश्वसागर परियार लगायतको सहभागिता रहेको थियो । कार्यक्रमलाई सफल बनाउन विभिन्न समिति समेत गठन गरिएको छ ।
Discussion about this post