सुर्खेत पुस २८ गते ।
कर्णाली प्रदेशका प्रमुख गोविन्दप्रसाद कलौनीले भ्रष्टाचार नेपाली जनताको साझा शत्रु भएकाले यसलाई जरैदेखि उखेल्नुपर्ने बताउनु भएको छ । सोमबार वीरेन्द्रनगरमा आयोजित एक कार्यक्रममा अख्तियार दुरुपयोग अनुसन्धान आयोगको कार्यालयले तयार पारेको २९औं वार्षिक प्रतिवेदन ग्रहण गर्दै प्रदेश प्रमुख कलौनीले यस्तो बताउनुभएको हो ।
समग्र देशको आंकडा हेर्दा कर्णाली प्रदेशमा अख्तियार दुरुपयोगको अवस्था अन्य प्रदेशको तुलनामा कम भएको पाइएता पनि कर्णाली प्रदेशको भौगालिक विकटता, जनचेतनाको कमी र पहुँचको कमीले गर्दा पनि आयोगमा उजुरी दर्ता कम भएको हुनसक्ने बताउँदै यस तर्फ समयमै सजग हुन आग्रह गर्नुभयो । प्रमुख कलौनीले अख्तियारले अनुसरण गरेको भ्रष्टाचार विरुद्धको शून्य सहनशीलताको व्यवहार सराहनीय भएको बताउनुभयो । आयोगले लिएको प्रवद्र्धनात्मक, निरोधात्मक र दण्डात्मक ३ खम्बे रणनीतिमा प्रवद्र्धनात्मक रणनीतिलाई थप महत्व दिनुपर्ने बताउँदै प्रमुख कलौनीले सकेसम्म निरोधात्मक र दण्डात्मकतर्फ जान नपर्ने परिस्थितिको सिर्जना गर्नुपर्नेमा जोड दिनुभयो ।
हामी अहिले संघीयताको नयाँ अभ्यासबाट समृद्धिको यात्रामा भएको बताउँदै प्रमुख कलौनीले भ्रष्टाचार निर्मुल नभईकन समृद्धि सम्भव नहुने भएकाले भ्रष्टाचार विरुद्धको काम कारबाहीमा तीनवटै सरकारले विशेष कौशल देखाउनुपर्ने बताउनुभयो ।
अख्तियार दुरुपयोग अनुसन्धान आयोगको कार्यालय सुर्खेतका प्रमुख शेषनारायण पौडेलले प्रतिवेदनको संक्षिप्त विवरण प्रस्तुत गर्दै कार्यालयको सक्रियता, आम मानिसमा सचेतना वृद्धि भएका कारण गत आव २०७४÷७५ को तुलनामा आव २०७५÷७६ मा उजुरी, फछर्यौट, विस्तृत अनुसन्धान, रंगेहात कारबाही र मुद्दा दर्तामा वृद्धि भएको बताउनुभयो । प्रदेशगत हिसाबमा आव २०७५÷७६ मा सबैभन्दा कम उजुरी दर्ता कर्णाली प्रदेशमा भएको बताउदै कार्यालय प्रमुख पौडेलले आयोजना तथा कार्यक्रम कार्यान्वयनमा समन्वय गरी दोहोरो बजेट विनियोजन नियन्त्रण गर्नुपर्नेमा जोड दिनुभयो ।
Discussion about this post