बाँके पुस २८ गते ।
थारु समुदायको नयाँ बर्ष तथा माघे सक्रान्तिको अवसरमा नेपालगञ्जमा माघ महोत्सव २०७६ भव्यका साथ सम्पन्न भएको छ ।
नेपालगन्ज माघ महोत्सवमा बाँकेका बिभिन्न क्षेत्र, स्थानबाट आएका व्यक्तिहरु थारु सांस्कृतिक झल्किने झाँकी तथा चर्चित चर्चित कलाकारहरुको उपस्थितिमा नेपालगञ्जमा भव्य माघ महोत्सव–२०७६ मनाएका छन् ।
महोत्सवका प्रमुख अतिथि राप्तीसोनारी गाउँपालिकाका अध्यक्ष लाहुरा थारुले आफ्नो कला, संस्कृतिको सम्मान र संरक्षणमा लाग्न जरुरी रहेको बताउनुभयो । उहाँले थारु कला संस्कृतिलाई बचाउन थारु अगुवा बुद्धिजिवी नै लाग्नुपर्ने धारणा राख्नुभयो । बषौं पुरानो सांस्कृतिलाई बचाउन गाउँ शहरमा सांस्कृति कलाको सम्मान गर्नुपर्ने आवश्यक रहेको उहाँले बताउनुभयो । हरेक समुदायमा पर्वको आ–आफ्नै महत्व रहेकाले यो कला संस्कृतिको संरक्षण भोलि इतिहास बन्ने भन्दै उहाँले भन्नुभयो, माघ महोत्सव आयोजना गरिएको महोत्सवले पनि थारु समुदायलाई संस्कृतिको टेवाका लागि सक्रिय बनाउने धारणा राख्नुभयो ।
माघमा जुन थारु समुदायले विहानै नुहाएर मनाउने पर्व थारु समुदायको लागि महत्वपुर्ण रहेको बताउनुभयो । माघको पहिलो दिन सयुक्त जिता (सुङगुर मार्ने दिन) मार्ने दिनबाट थारु समुदायमा माघको रौनक बेग्लै तरिकाको हुन सुरु गर्छ । माघको १ गते विहानै नुहाएर चामल छुने र त्यसैको टिका लगाउने चलन समेत रहेको छ उहाँले भन्नुभयो ।
पुजापाठ गरेर नजिकैको मन्दिर या आफन्तकहाँ सेवा लाग्ने चलन समेत प्रचलित रहेको उहाँले बताउनुभयो । यस्तै थारु कल्याणकारिणीसभा बाँकेका अध्यक्ष विनोद चौधरीले माघ पर्वलाई नेपालमै स्थापित गराउन माघ महोत्सव गरिएको उहाँले जानकारी गराउनुभयो । माघ महिनामा थारु समुदायमा हुने नयाँ कामको थालनीले नै नयाँ बर्षको परिभाषित गर्ने गरेको उहाँले बताउनुभयो । माघ महिनामै घरबार छुटिने, नयाँ गुरुवा, बडघर, खोजखजाना गरिने भएको हुनाले थारु समुदायको माघ महिना विशेष हुने गरेको उहाँले बताउनुभयो ।
थारु गाउँघरमा मात्र माघीको रौनक हुने आजभोली शहरमा पनि लागु हुदै गएपछि खुसी लागेको छ समाजसेवी फुलाराम थारुले भन्नुभयो । गाउँघरमा हुने रमाईलो शहरमा पनि देख्नपाएपछि खुसी लाग्ने गरेको उहाँले भन्नुभयो । गाउँको अनुभुति शहरमा देख्नपाएपछि झनै उत्साहित लागेको छ उहाँले भन्नुभयो ।
कार्यक्रममा बाँकेका बिभिन्न क्षेत्रका थारु अगुवाहरुले चाडपर्वले सबै समुदायलाई भाइचाराको सम्बन्ध निर्माणमा जोड दिने गरेकाले सबैको अस्तित्व नै देशको सांस्कृतिक अस्तित्व रहने भनाई राखेका थिए । थारु समूदायले माघे सक्रान्तिलाई नयाँ बर्षका रुपमा मनाउने गरेका छन् । ‘माघ महोत्सव’ कार्यक्रममा थारु समुदायको सांस्कृतिक झुम्रा, लठ्ठहवा, हुरदुङग्वा, छोक्रा, मयुर र दफ नाच प्रस्तुत भएको थियो ।
त्यस्तै महोत्सवमा थारु समुदायका चर्चित कलाकार विवश चौधरी, करन चौधरी, राम थारु, सुनिता दहित, सुमित्रा चौधरी, खेम भौगरिया, सोहनलाल थारु, संजिता चौधरी, विमल चौधरी, सविना चौधरी, निरमला चौधरी, राजकुमार चौधरी, संन्जिता चौधरी, लक्ष्मी चौधरी, रमेश चौधरी, जगत गुरु लगायतले समेत प्रस्तुती दिनुभयो ।
साथै पछिल्लो समय थारु समुदायकी चर्चित गायक तथा मोडल श्रीदेवी चौधरीले समेत आफ्ना चर्चित गीतहरु प्रस्तुत गर्नुभयो । कार्यक्रममा थारु परिकारहरु, ढिक्री, घोँघी, खुर्सानीको चटनी, बंगुरको मासुका परिकारहरु अथितिहरुलाई खुवाइएको प्रचार प्रसार समितिका संयोजक भगतराम थारुले जानकारी दिनुभयो ।
यस्तै कार्यक्रममा थारु कला संस्कृति र थारु समुदायको लागि योगदान पुर्याएका ७ जना व्यक्तिलाई सम्मान समेत गरिएको थियो । महोत्सव अघि नेपालगञ्जको धम्बोझी चोकबाट शुरु भएको प्रभात फेरी सेतुविक चोक, न्युरोड, त्रिवेणीमोड, त्रिभुवन चोक हुदै भेरी प्राविधिक शिक्षालयमा पुगी कार्यक्रममा परिणत भएको थियो ।
Discussion about this post