खोजखबर संवाददाता
बाँके असार २७ गते । शहरी विकास मन्त्री मो. इस्तियाक राईले नेपालगञ्ज उद्योग बाणिज्य संघ सँगको सम्झौता खारेज भएपनि नेपालगञ्जमा बहुउद्देश्यीय सभाहल र प्रदर्शनी स्थल निर्माण हुने बताउनुभएको छ । संघले सभाहल निर्माणका लागि भोगाधिकारका प्राप्त गरेको सडक डिभिजन कार्यालयको १० विघा जग्गाको सम्झौता मन्त्री परिषदले खारेज गरेको हो । मन्त्री राईले सभाहल र प्रदर्शनी स्थलका लागि एक अर्ब बजेट विनियोजन भएको जानकारी दिदै कम्तीमा पाँच विघा जग्गा आवश्यक पर्ने बताउनुभयो । नेपालगञ्ज उपमहानगरपालिकाका मेयर डा. धवलशम्शेर राणालाई जग्गा खोज्न आग्रह गरिसकेको छ , मन्त्री राईले भन्नुभयो,– कारकादौंको सट्टा स्थान संशोधन गर्न सकिन्छ । उहाँले नेपालगञ्जमा जग्गा नभेटिए डुडुवा वा जानकी गाउँपालिकाको नेपालगञ्जसँग जोडिएको क्षेत्रमा समेत सभाहल निर्माण गर्न सकिने बताउनुभयो । मन्त्री राईको एकल पहलमा सभाहल र प्रदर्शनीस्थलका लागि एक अर्ब बजेट विनियोजन भएको हो ।
भोगाधिकारका लागि प्राप्त भएको जग्गालाई लिजमा परिणत गर्ने निर्णय २०७१ सालमा भएपनि नेपालगञ्ज उद्योग बाणिज्य संघले लिजको प्रक्रियामा नगएको, भाँडा नतिरेको र सडक डिभिजन कार्यालयलाई बनाईदिनुपर्ने ८ वटा भवन समेत नबनाएको पाइएपछि भौतिक पूर्वाधार मन्त्रालयको प्रस्तावमा मन्त्रीपरिषदले सम्झौता खारेज गरेको हो । संघले सभाहलमा नाममा बर्षेनी महोत्सव आयोजना गरेर अढाई करोड रुपिया बचत गरेको भएपनि तीन लाख २५ हजार रुपिया भाँडा नतिरेको पाइएको छ । सभाहल तथा प्रदर्शनीस्थलका लागि संघको नेतृत्वले नै बेवास्ता गरेको भन्दै सामाजिक सञ्जालमा तिव्र आलोचना भइरहेको छ । पहिले ३० बर्ष र पछि २० बर्ष थप गर्न सकिने गरि संघलाई २०६४ सालमा भोगाधिकारका लागि जग्गा दिइएको हो ।
Discussion about this post