सिराज खान
बाँके साउन ७ गते । नेपाल सरकारका शहरी बिकास मन्त्रि मोहम्मद इस्तियाक राईले आफ्नो गृह जिल्ला बाँकेका हाजीहरुलाई मंगलवार विहान त्रिभुवन अन्तर्राष्टिय विमानस्थलमा शुभकामना दिंदै विदाई गर्नु भएको छ । मक्का मदिनामा हज गर्नका लागि बाँके जिल्लाबाट १२३ जना हजयात्रीहरु मंगलवार एअर अरेबियाको विमानबाट त्यसतर्फ रवाना भएका हुन् ।
विमानस्थलमा हरेक हाजीलाई अंकमाल गरेर शुभकामना दिई विदाई गर्दै मन्त्री राईले वर्तमान सरकारले हज व्यवस्थापनका लागि विशेष व्यवस्था गरेको बताउनु भयो । उहाँले व्यवस्थापनमा अझैपनि केही कमी कमजोरी रहेको गुनासाहरु आइरहेको जनाउँदै ती कमी कमजोरीमा सुधार ल्याउन हज समितिलाई निर्देशन दिनु भयो ।
पहिलो पटक सरकारको पहलमा साउदी सरकारले ३ सय जनाको कोटा थप गरेको जनाउँदै उहाँले यस बर्षबाट ३ सय जना बढी नेपाली मुस्लिमले हज गर्न पाउने बताउनु भयो । उहाँले काठमाण्डौमा हज हाउस नभई नहुने अवस्था आएकोले अब छिटै हज हाउस निर्माणको पहल र प्रक्रिया शुरु गरिने पनि सो अवसरमा बताउनु भयो ।
मन्त्री राईले यसअघि हाजीहरुको पहिलो टोलीको उडान भएको दिन साउन २ गते पनि विमानस्थलमा पुगेर हाजीहरुलाई विदाई गर्नु भएको थियो ।
आफ्नो गृह जिल्लाका हाजीहरुलाई विदाई गर्न मन्त्री राई विमानस्थल पुगदा निकै खुुशी लागेको आफन्तलाई विदाई गर्न विमानस्थल पुगेका नेपालगन्ज निवासी जियाउल हकले बताउनु भयो । सोही प्रकारको प्रतिक्रिया आफन्तलाई विदाई गर्न विमानस्थल पुगेका अर्का नेपालगन्जका बासिन्दा बाबु हल्वाईले बताउनु भयो ।
हाजीहरुलाई विदाई गर्न सांसद कलिला खान र मुस्लिम अगुवा सेराज फारुकी पनि विमानस्थल पुग्नु भएको थियो ।
साउन २ गतेबाट शुरु भएको हाजीहरुको साउदी अरब जाने क्रम निरन्तर जारी रहेको छ । सो क्रम साउन १३ गतेसम्म जारी रहने बताईएको छ । हज समितिका अध्यक्ष शमसेर मिया र केही सदस्यहरु पहिलेनै साउदी अरबको मक्कामा पुगेर व्यवस्थापनमा सक्रिय रहेको समितिले जनाएको छ ।
Discussion about this post