भिष्म लाेध बाँके चैत २८ गते । कोरोना भाइरसको महामारी रोकथाम तथा नियन्त्रणका लागि प्लान इन्टरनेशनलले बाँके बर्दियाका बिभिन्न कार्यालयहरुलाई चार लाख बढिको स्वास्थ्य सामाग्री सहयोग प्रदान गरेको छ । प्लानले शुक्रबार महामारी नियन्त्रणमा प्रत्यक्ष रुपमा खटिएका बाँके बर्दियाका कार्यालयहरुलाई आवश्यक स्वास्थ्य सामाग्रीहरु सहयोग प्रदान गरेको हो ।
बिश्वभरी कोरोना भाइरसको आक्रमण बढिरहेको अवस्थामा नेपालमा पनि यस महामारीको प्रकोप नियन्त्रणका लागि सबै क्षेत्र, निकाय सक्रिय रुपमा लागेका छन् । यही रोकथाम तथा नियन्त्रणको कार्यलाई सहज बनाउन माग भए अनुसार आवश्यक स्वास्थ्य सामाग्री सहयोग प्रदान गरेको प्लान इन्टरनेशन फिल्ड कार्यालय बाँकेका प्रारम्भिक बाल बिकास कार्यक्रम संयोजक किरण भण्डारीले जानकारी दिनुभयो ।
उहाँका अनुसार प्लानले बाँके र बर्दियामा कोरोना महामारीको नियन्त्रणमा प्रत्यक्ष रुपमा खटिएका छ वटा कार्यालयलाई चार लाख दश हजार एक सय ८८ रुपैया बराबरको सामाग्री सहयोग गरिएको छ । स्वास्थ्य सामाग्री पाउनेहरुमा जिल्ला स्वास्थ्य कार्यालय बाँके, बाँकेको खजुरास्थित शुशिल कोइराला मेमोरियाल क्यान्सर अस्पतालमा निर्माण गरिएको आइशोलेशन अस्पताल, जानकी गाउँपालिका वडा नं–१ बढैयास्थित शशस्त्र प्रहरी बल, जिल्ला स्वास्थ्य कार्यालय बर्दिया तथा जिल्ला अस्पताल र ठाकुरबाबा नगरपालिका रहेका छन् ।
जिल्ला स्वास्थ्य कार्यालय बाँकेका जनस्वास्थ्य अधिकृत अंगद बहादुर शाही, जिल्ला स्वास्थ्य कार्यालय बर्दियाका जनस्वास्थ्य अधिकृत इन्द्र राजबंशीले सहयोग स्वास्थ्य सामाग्री ग्रहण गर्नुभएको थियो । जनस्वास्थ्य अधिकृत शाहीले प्लानबाट भएको सहयोगका लागि धन्यवाद दिँदै सामाग्रीले प्रकोप नियन्त्रणमा खटिने कर्मचारीलाई काम गर्न सहजता प्रदान गर्ने बताउनुभयो । यसरी सहयोग गरिएको स्वास्थ्य सामाग्रीमा एन–९५ मास्क–२०० पिस, सर्जिकल मास्क ३,३०० पिस, ह्याण्ड सेनिटाईजर ५०० ग्राम–१७० वटा, ह्याण्ड सेनिटाईजर १०० ग्राम–३० वटा, प्रोटेक्टिभ आइ ग्लास (चस्मा)–३० थान, इग्जामिनेशन ग्लब्स–१,२५० थान, सर्जिकल ग्लब्स–५०० पिस, किटनाशक औषधी छर्ने मेसिन–५ थान र किटानाशक औषधी–५ थान रहेका छन् ।
Discussion about this post